महाराष्ट्र संवाद न्यूज नेटवर्क
नाशिक / अहमदनगर
नाशिक पदवीधर मतदार संघासाठीच्या जाहीर प्रचाराचा तोफा शनिवारी संध्याकाळी पाच वाजता थंडावल्या आहे. पदवीधर साठी येत्या सोमवारी (ता.३०) तारखेला नाशिक विभागातील पाचही जिल्ह्यात मतदान होत आहे. निवडणूक प्रचारामध्ये सोशल मीडियाचा यावेळी मोठा बोलबाला दिसून आला. काही माध्यमातील एकतर्फी बातम्या पदवीधरांनी फारशा गांभीर्याने घेतल्या नसल्याचे दिसून आले. पेड नावाचा विकृतीचा राक्षस याही निवडणुकीत दिसून आल्याच्या भावना मतदारांनी व्यक्त केल्या. सोशल माध्यमातून अनेक पदवीधरांनी आपली भूमिका जाहीरपणे व्यक्त केली. या निवडणुकीतील मतदार हा संपूर्णतः सुशिक्षित आणि पदवीधर असल्याने चांगल्या-वाईटाची जाण या मतदारांमध्ये दिसून आली.
नाशिक पदवीधर मतदार संघामध्ये 16 उमेदवार आपले नशीब आजमावत असले तरी प्रमुख लढत ही अपक्ष उमेदवारांमध्ये आहे. या मतदारसंघात महाविकास आघाडी आणि भारतीय जनता पक्षाचा अधिकृत उमेदवार नसल्याने तसेच आघाडीचे अधिकृत उमेदवार विद्यमान आमदार डॉ. सुधीर तांबे यांनी उमेदवारी अर्ज दाखल न केल्याने महाविकास आघाडीला या मतदारसंघात शुभांगी पाटील या अपक्ष उमेदवाराला पाठिंबा देण्याची आफत ओढावली आहे. याशिवाय विद्यमान आमदार डॉ. सुधीर तांबे यांचे चिरंजीव सत्यजित तांबे यांनी देखील अपक्ष उमेदवारी अर्ज दाखल केलेला आहे. त्यामुळे तांबे पिता-पुत्रावर पक्षाकडून निलंबनाची कारवाई करण्यात आली आहे.
भारतीय जनता पक्षाचादेखील अधिकृत उमेदवार या मतदारसंघात नसल्याने ते सत्यजित तांबे यांच्या पाठीशी आपली संपूर्ण ताकद उभी करतील अशी अपेक्षा होती. मात्र प्रचाराचा समारोप झाला तरी देखील भारतीय जनता पक्षाने पाठिंब्याबाबतचा आपला सस्पेन्स प्रचार समारोपापर्यंत अद्यापही कायम ठेवला आहे. या मतदारसंघातील प्रमुख लढत ही आता अपक्षांमध्ये होणार आहे.
नगर जिल्ह्यात भारतीय जनता पक्षाचा निर्णय हा प्रामुख्याने महसूल मंत्री राधाकृष्ण विखे पाटील यांच्या निर्णयावर अवलंबून दिसतो. त्यामुळे फडणवीस विखे यांच्या शिर्डी भेटीत नेमकी काय चर्चा झाली हे अद्यापही समोर आलेले नाही. तर सत्यजित तांबे यांच्यासोबत महाविकास आघाडीतील प्रमुख घटक पक्ष असलेल्या काँग्रेस पक्षाचे पदाधिकारी उघडपणे निवडणूक प्रचारात दिसून आले. अहमदनगरचे खासदार डॉ. सुजय विखे पाटील यांनी निवडणूक निकाल बदलविण्याची क्षमता भाजप कार्यकर्त्यात असल्याचे सांगत शेवटच्या क्षणी निर्णय आला की विजयाची गणिते बदलविणार असल्याचा आत्मविश्वास व्यक्त केल्याने विखे यांची ताकद कोणाच्या पाठीशी उभे राहणार याबाबत देखील साशंकता आहे.
जिल्ह्यातील भारतीय जनता पक्षाचे पदाधिकारी कार्यकर्ते विखे यांच्या आदेशाच्या प्रतीक्षेत आहे. भाजप या मतदारसंघात कोणत्या उमेदवाराला पाठिंबा दर्शविते यावर देखील विजयाची गणिते ठरतील. प्रमुख उमेदवार असलेल्या अपक्ष तांबे-पाटील यांच्या लढतीमध्ये पदवीधर आणि निवडून येणारा भावी आमदार कोणासोबत जाणार हे 2 फेब्रुवारीच्या मतमोजणीनंतर स्पष्ट होणार आहे.
निवडणूक प्रचार तोफा थंडावल्या असून सोमवारी नाशिक विभागातील नाशिकसह अहमदनगर, जळगाव, धुळे आणि नंदुरबार या पाचही जिल्ह्यात 338 मतदान केंद्रावर सकाळी आठ ते सायंकाळी चार या वेळेत मतदान घेतले जाणार आहे.
