महाराष्ट्र संवाद न्यूज नेटवर्क
कोकण शिक्षक मतदार संघातून भाजपने विजयी सलामी दिल्यानंतर त्या पाठोपाठ सत्ताधारी भाजपसाठी महत्त्वपूर्ण असलेला फडणवीस-गडकरी यांचा बालेकिल्ला नागपूरचा गड मात्र महाविकास आघाडीने आपल्या ताब्यात घेतला आहे. नागपूर शिक्षक मतदार संघातून काँग्रेसचे सुधाकर आडबाले मोठ्या मताधिक्याने विजयी झाले आहेत.
पहिल्या पसंतीचा कोटा पूर्ण करणाऱ्या सुधाकर आडबाले यांच्या विजयाची घोषणा करण्यात आले असून महाविकास आघाडीचा पहिला विजयी उमेदवार जाहीर झाला आहे. सुधाकर आडबाले यांनी भाजपचे उमेदवार विद्यमान आमदार नागो गाणार यांचा पराभव केला.
नागपूर मतदार संघ हा केंद्रीय मंत्री नितीन गडकरी आणि राज्याचे उपमुख्यमंत्री देवेंद्र फडणवीस यांचा हक्काचा बालेकिल्ला मानला जातो या बालेकिल्लातून काँग्रेसचा पर्यायाने महाविकास आघाडीचा उमेदवार विजयी झाल्याने सत्ताधारी भाजप सोबतच गडकरी-फडणवीसांसाठी हा मोठा धक्का मानला जात आहे. याशिवाय चंद्रशेखर बावनकुळे, सुधीर मुनगंटीवार या भाजप दिग्गज नेत्यांचे वर्चस्व या मतदारसंघावर असल्याने महाविकास आघाडीचा हा सर्वात मोठा विजय मानला जात आहे.महाविकास आघाडीचे उमेदवार सुधाकर आडबोले यांना 16500 तर ना. गो. गाणार यांना 6366 मते मिळाली गाणार यांचा 10134 मतांनी पराभव झाला. कोकण शिक्षक मतदार संघात भाजपने तर नागपूर शिक्षक मतदार संघात महाविकास आघाडीने खाते उघडले असून उर्वरित नाशिक, अमरावती आणि औरंगाबाद या तीन ठिकाणची मतमोजणी सुरू आहे या ठिकाणचे कल अद्यापही स्पष्ट झालेले नाही.
नाशिक पदवीधर मतदार संघातील मतमोजणीच्या पहिल्या फेरी अखेर अपक्ष उमेदवार सत्यजित तांबे त्यांच्या प्रतिस्पर्धी अपक्ष उमेदवार शुभांगी पाटील यांच्यापेक्षा 8266 मतांनी आघाडीवर असल्याची माहिती मिळाली आहे. तांबे यांना 15784 तर महाविकास आघाडीच्या उमेदवार असलेल्या पाटील यांना 7862 मते मिळाली असून मोठ्या प्रमाणात जवळपास दहा टक्के म्हणजेच 2741 मतं या मतदारसंघात बाद झाली आहेत. पदवीधरांनी ही मते एवढ्या मोठ्या प्रमाणात का बाद केली असावीत याबद्दल चर्चा सुरू आहे.
अशी आहे सविस्तर मतांची आकडेवारी
पहिली फेरी
📌 नाशिक विभाग विधानपरिषद पदवीधर मतदारसंघ निवडणूक अपडेट
एकूण मतदान – 1 लाख 29 हजार 456
➡️ वैध मते -25,259
➡️ अवैध मते – 2741=========================
➡️सत्यजित सुधीर तांबे -15784
➡️शुभांगी भास्कर पाटील -7862
➡️ रतन कचरु बनसोडे-560
➡️ सुरेश भिमराव पवार-225
➡️अनिल शांताराम तेजा-28
➡️अन्सारी रईस अहमदअब्दुल कादीर-51
➡️अविनाश महादू माळी -268
➡️इरफान मो इसहाक-18
➡️ ईश्वर उखा पाटील-45
➡️बाळासाहेब रामनाथ घोरपडे-142
➡️ॲड. जुबेर नासिर शेख-54
➡️ॲड. सुभाष राजाराम जंगले-46
➡️नितीन नारायण सरोदे-63
➡️पोपट सिताराम बनकर-24
➡️सुभाष निवृत्ती चिंधे-46
➡️संजय एकनाथ माळी-43
=============एकूण 25,259
