आमची चूक झाली; सत्यजित तांबेंबद्दल अजित पवार नेमकं काय म्हणाले…

महाराष्ट्र संवाद न्यूज नेटवर्क
शिकलेल्या पदवीधर आणि राज्यातील शिक्षकांनी कोणाला निवडून दिले हे आपण निकालातून बघितले आहे. शिकलेल्या मतदाराने दिलेला कौल कशा प्रकारचा आहे हे आपण बघितले पाहिजे. शिक्षक आणि पदवीधर मतदार संघाच्या निवडणुकीचा निकाल राज्यकर्त्यांच्या डोळ्यात अंजन घालणारा आहे. नाशिकमध्ये सत्यजित तांबे यांच्या बाबतीत आमची चूक झाली त्यांना उमेदवारी द्यायला हवी होती, असे वक्तव्य राज्याचे विरोधी पक्षनेते अजित पवार यांनी केले.
पवार शनिवारी रात्री बारामती येथे झालेल्या जाहीर सभेत बोलत होते. सभेतच पवारांनी तांबे यांच्या बद्दल अशा प्रकारचे वक्तव्य करत त्यांच्या पाठीशी असल्याचे सुचित केले.
शुक्रवारी सत्यजित तांबे यांनी पत्रकार परिषद घेत काँग्रेसचे प्रदेशाध्यक्ष नाना पटोले, महाराष्ट्र काँग्रेसचे प्रभारी एच. के. पाटील यांच्यावर गंभीर स्वरूपाची टीका केली होती. पक्षांतर्गत तांबे थोरात यांची बदनामी करण्यासाठी षडयंत्र पक्षातील काही नेत्यांनी रचले असल्याचा आरोप केला होता. तत्पूर्वी या पार्श्वभूमीवर अजित पवार यांनी सत्यजित तांबे यांनी वडील आणि मामांचा सल्ला ऐकून निर्णय घेण्याचा सल्ला देत तांबे यांचे समर्थन केले होते. त्यामुळे प्रदेशाध्यक्ष पटोले यांनी अजित पवार यांनीच सत्यजित तांबेंच्या घरातील भांडणे चव्हाट्यावर आणली असल्याचे म्हटले होते. त्यानंतर अजित पवार यांनी सत्यजित तांबे यांना उमेदवारी द्यायला हवी होते असे सांगत थेटपणे प्रदेशाध्यक्ष पटोले यांच्यावर निशाणा साधला आहे.
सत्ताधाऱ्यांविरोधात पदवीधर शिक्षकांचा कौल
बारामतीच्या सभेत अजित पवार म्हणाले, राज्यातील शिक्षक आणि पदवीधरांनी कोणाला निवडून दिले आहे हे समोर आहे. फोडाफोडीचे राजकारण महाराष्ट्र फार काळ सहन करत नाही. सत्ताधाऱ्यांच्या डोळ्यात अंजन घालणारा हा निकाल असून अद्याप स्थानिक स्वराज्य संस्थांच्या निवडणुका बाकी आहे. शिकलेल्या मतदारांनी कोणत्या प्रकारचा कौल दिला आहे हे सामान्य माणसांनी बघितले पाहिजे.
तांबे यांच्या बद्दल बोलताना ते म्हणाले, सत्यजित तांबे यांना उमेदवारी द्यायला हवी होती. तरुण जर चांगले काम करत असेल तर तरुणांना संधी दिली पाहिजे, या मताचा मी आहे. मात्र नाशिकची जागा काँग्रेसकडे असल्याने आणि त्या जागेवर कोणाला उमेदवारी द्यावी हा सर्वस्वी त्यांचा अधिकार असल्याने त्यात मी लुडबुड करण्याचे काही कारण नव्हते, असे देखील त्यांनी स्पष्ट केले.