संगमनेर
एक तालुका एक परिवार ही संकल्पना राज्याला देणारे काँग्रेस विधिमंडळ पक्षनेते आमदार बाळासाहेब थोरात यांनी संगमनेर तालुक्यातील प्रत्येक कुटुंबाच्या सुखदुःखात सहभाग घेतला असून तालुक्यातील जनतेने त्यांच्यावर जीवापाड प्रेम केले आहे. त्यांच्या अभिष्टचिंतन सोहळ्यानिमित्त झालेल्या शिंदेशाही बाणा कार्यक्रमात विक्रमी गर्दीत नागरिकांनी धमाल केली.
जाणता राजा मैदान येथे नामदार बाळासाहेब थोरात मित्र मंडळाच्यावतीने आयोजित शिंदे शाहीबाणा हा कार्यक्रम प्रख्यात गायक आनंद शिंदे, मिलिंद शिंदे, आदर्श शिंदे व उत्कर्ष शिंदे यांच्या उपस्थितीत झाला. यावेळी माजी आमदार डॉ. सुधीर तांबे, आमदार लहू कानडे, नाशिक पदवीधरचे नवनिर्वाचित आमदार सत्यजित तांबे, कांचनताई थोरात, दुर्गाताई तांबे, इंद्रजीत थोरात, कॅन्सरतज्ञ डॉ. जयश्रीताई थोरात, जिल्हा परिषद सदस्य रामहरी कातोरे, अजय फटांगरे आदींसह नामदार बाळासाहेब थोरात मित्र मंडळाचे विविध पदाधिकारी उपस्थित होते.
कार्यक्रमाच्या सुरुवातीला डॉ. उत्कर्ष शिंदे यांनी ‘तूच सुखकर्ता, तूच दुखहर्ता’ या गीताने सुरुवात केली. तर महागायक आनंद शिंदे यांनी ‘पार्वतीच्या बाळा, तुझ्या पायात वाळा’ हे गाणे गाताच उपस्थित हजारो नागरिकांनी टाळ्यांचा कडकडाट केला. त्यानंतर मिलिंद शिंदे यांनी गायलेली ‘गेला कान्हा कुण्या गावा’ या गवळणीला प्रेक्षकांनी भरभरून दाद दिली. स्टार गायक उत्कर्ष शिंदे यांनी ‘तू ग दुर्गा, तू भवानी, संसाराची तूच जननी, अंबे कृपा करी’ हे गीत गाताच सर्वत्र एकच जल्लोष झाला.
यानंतर आनंद शिंदे यांनी छत्रपती शिवाजी महाराज व भारतरत्न डॉ. बाबासाहेब आंबेडकर यांच्यावर गायलेल्या
‘दोनच राजे इथे जन्मले कोकण पुण्य भूमीवर, एक त्या रायगडावर एक त्या चवदार तळ्यावर’ या गीतावेळी अंगाला शहर आले. तर ‘घागर गळकी घेऊन बाई निघाली’, ‘जवा नवीन पोपट’ यांसह विविध लोकगीतांनी धमाल उडून दिली. ‘कोंबडी पळाली’सह आदर्श शिंदे यांनी गायलेले ‘तुझ्या रूपाचं चांदणं’ याचबरोबर ‘आवाज वाढव डीजे’ या गीताला उपस्थित तरुण व महिलांनी भरभरून दाद दिली. आनंद शिंदे, मिलिंद शिंदे, आदर्श शिंदे, उत्कर्ष शिंदे यांनी गायलेली ‘उड जायेगा एक दिन पंछी रहेगा पिंजरा खाली’ या कव्वालीला संगमनेरकरांनी डोक्यावर घेतले. काँग्रेस विधिमंडळ पक्ष नेते आमदार बाळासाहेब थोरात यांच्या कार्यकर्तृत्वाची गौरवगाथा असणारे आनंद शिंदे यांनी गायलेले ‘राज्यात गाणं गाजतय जोरात बाळासाहेब थोरात’ हे गीत गाताच जाणता राजा मैदानावर एकच जल्लोष झाला.
आ. थोरात यांच्या मनोगतावेळी मैदान स्तब्ध
खांद्यावर झालेल्या शस्त्रक्रियेनंतर सुमारे दीड महिन्यानंतर आमदार बाळासाहेब थोरात यांना स्क्रीनवर समोर सर्वांनी पाहिल्यानंतर सर्व मैदान स्तब्ध झाले. आमदार थोरात यांनी जनतेशी संवाद साधला. यावेळी उपस्थित तरुण नागरिक आबाल वृद्ध व तालुक्यातील तमाम जनतेला गहिवरून आले. उपस्थित सर्वांनी थोरात साहेबच आपले कुटुंब प्रमुख असल्याने आम्ही त्यांच्या सोबत आहोत अशा भावना व्यक्त केल्या.
