महाराष्ट्र संवाद न्यूज नेटवर्क
घारगाव : संगमनेर तालुक्यातील बोटा येथे महाशिवरात्रीनिमित्त कच नदीच्याकाठी श्री कचेश्वर मंदिरात दरवर्षीप्रमाणे यंदाही अखंड हरिनाम सप्ताहाचे भव्य दिव्य आयोजन करण्यात आले आहे. मात्र यंदा गावातील मुस्लीम बांधवांनी सामाजिक सलोखा जपत हरिनाम सप्ताहामध्ये उभारण्यात आलेल्या मंडप खर्चाची जबाबदारी घेतली आहे. त्यांच्या या उपक्रमामुळे गावात हिंदू-मुस्लिम ऐक्याची वीण घट्ट असल्याचे ग्रामस्थांनी दाखवून दिले.
दरवर्षीप्रमाणे यंदाही बोटा येथे महाशिवरात्रीनिमित्त कच नदीच्याकाठी श्री कचेश्वर मंदिरात रविवार दि. १२ ते रविवार दि.१९ फेब्रुवारीपर्यंत अखंड हरिनाम सप्ताहाचे भव्य दिव्य आयोजन करण्यात आले आहे. अखंड हरिनाम सप्ताह काळात दररोज विविध धार्मिक कार्यक्रमांचेही आयोजन करण्यात आले आहे.
विशेष म्हणजे यंदा पहिल्यांदाच रोज सायंकाळी बोटा, केळेवाडी, कुरकुटवाडी, तळपेवाडी, माळवाडी, हनुमाननगर ग्रामस्थांच्या पुढाकाराने कीर्तनानंतर महाप्रसादाचे नियोजन करण्यात आहे. गावातील सर्वधर्माच्या लोकांनी एकत्र येत महाप्रसादाचा दिवस वाटून घेतला आहे. यंदा सप्ताहाच्या आयोजनामध्येही मुस्लिम बांधवांनी सहभाग घेतला आहे. सर्वमुस्लीम बांधवांनी सप्ताह काळात उभारण्यात येणाऱ्या मंडपाच्या खर्चाची जबाबदारी घेतली आहे. त्यामुळे या उपक्रमाचे सर्वत्र कौतुक केले जात आहे.
दरम्यान, बोटा गाव विधायक कामांमध्ये नेहमीच अग्रेसर असते. गेल्या अनेक वर्षांपासून गावच्या अखंड हरिनाम सप्ताहाची परंपरा कायम आहे. या सप्ताहात सर्व जाती धर्माचे लोक सहभागी होतात. मुस्लिम बांधवांनी मंडप खर्चाची जबाबदारी घेत धार्मिक विद्वेषाला गावकरी कधीच बळी पडणार नाही, असा संदेशच देण्यात आला आहे.
हरिनाम सप्ताह कालावधीत मंडप खर्चाची जवाबदारी मुस्लिम बांधवांनी घेणे ही बाब निश्चितच स्वागतार्ह आहे. प्रत्येक गावात असे आयोजन केल्यास हिंदू-मुस्लिम धर्मात निर्माण होणारी दरी कमी होईल.
संतोष (पांडू) शेळके, उपसरपंच बोटामहाशिवरात्रीनिमित्त कच नदीच्याकाठी श्री कचेश्वर मंदिरात दरवर्षी सप्ताहाचे आयोजन असते. यंदा ग्रामस्थांनी भव्य दिव्य आयोजन केले असून सर्वधर्माच्या लोकांनी सहभाग नोंदविला आहे. त्यामुळे मंडप खर्चाचे यजमानपद मुस्लीम बांधवाना द्या, अशी विनंती आम्ही सप्ताह कमिटीला केली होती. कमिटीने सामाजिक एकोपा आणि सलोख्यासाठी दोन पावले पुढे येऊन आम्हाला मंडप खर्चाची जवाबदारी दिली आहे.
शौकत शेख, नुरानी मस्जिद व कब्रस्तान ट्रस्ट
