महाराष्ट्र संवाद न्यूज नेटवर्क
नाशिक पदवीधर मतदार संघाचे आमदार सत्यजीत तांबे यांनी मंगळवारी एक नवे ट्विट करत पुन्हा एकदा राजकीय चर्चांना सुरुवात केली आहे. एकीकडे आपण कॉग्रेस सोडली नसल्याचे सांगणाऱ्या सत्यजीत तांबे यांना या ट्विटमधून नेमके काय साध्य करायचे याची चर्चा पून्हा एकदा राजकीय वर्तुळात सुरु झाली आहे. तांबे मामांचा हात सोडणार की भाऊसाहेब थोरात यांच्या विचारावर वाटचाल करण्याचे सुचित करत मामांचा हात घट्ट पकडणार का? असा प्रश्न निर्माण झाला आहे. तांबे या ट्विटने भाजपच्या गोटात पुन्हा एकदा आनंदाचे वातावरण निर्माण झाले आहे.
कॉग्रेसचे बंडखोर नेते आणि नाशिक पदवीधर मतदारसंघाचे नवनिर्वाचित आमदार सत्यजीत तांबे यांनी निवडून आल्यानंतर आपण अपक्षच राहणार असल्याचे स्पष्ट केले होते. त्यापाठोपाठ सोमवारी संगमनेरमध्ये झालेल्या एका कार्यक्रमात माजीमंत्री आमदार बाळासाहेब थोरात यांनी सत्यजीत तुझी सगळी टीम कॉग्रेसमध्ये आहे, तुला आमच्याशिवाय आणि आम्हाला तुझ्याशिवाय करमणार नाही, तु किती दिवस अपक्ष राहतो, ते बघुया असे म्हणत पुन्हा एकदा कॉग्रेस प्रवेशाचे संकेत दिले होते.
नाशिक पदवीधर मतदारसंघाच्या निवडणूकीनंतर तांबे यांनी आपली सविस्तर भूमिका मांडत आपण कॉग्रेस सोडली नसल्याचे स्पष्ट केले होते. तसेच आपण अपक्ष आमदार म्हणून काम करणार असल्याचे सुचित केले होते. त्यापाठोपाठ विधान परिषदेत झालेल्या शपथविधी समारंभातही त्यांनी छत्रपती शिवाजी महाराज, राजर्षी शाहु, महात्मा ज्योतीबा फुले, डॉ. बाबासाहेब आंबेडकर यांच्यासह आजोबा सहकारमहर्षी, स्वातंत्रसेनानी भाऊसाहेब थोरात यांच्या स्मृतीला वंदन करत शपथ घेतांना आपण कोणत्या विचारधारेसोबत आहोत, हे स्पष्ट केले होते.
मात्र मंगळवारी त्यांनी केलेले ट्विट सोशल मिडीयावर व्हायरल झाले असून त्यात त्यांनी म्हटले आहे की,
“उडत्या पाखरांना परतीची तमा नसावी… नजरेत सदा नवी दिशा असावी|
घरट्याच काय बांधता येईल केव्हाही… क्षितीजा पलिकडे झेप घेण्याची जिद्द असावी|” या ट्विटमुळे पुन्हा एकदा राजकीय चर्चांना उधाण आले आहे. या ट्विटमुळे तांबे पुन्हा एकदा राजकीय वर्तुळात चर्चेत आले आहेत.
उडत्या पाखरांना परतीची तमा नसावी…
नजरेत सदा नवी दिशा असावी ।घरट्याचे काय बांधता येईल केव्हाही…
क्षितिजा पलीकडे झेप घेण्याची जिद्द असावी ।— Satyajeet Tambe (@satyajeettambe) February 14, 2023
