महाराष्ट्र संवाद न्यूज नेटवर्क
केंद्रीय निवडणूक आयोगाच्या निकालानंतर शिवसेना हे नाव आणि धनुष्यबाण चिन्ह शिंदे गटाला देण्यात आले आहे. वास्तविक ठाकरे गटाकडून दुसऱ्या गटाला चिन्ह आणि पक्षाचे नाव देण्याचा निर्णय दुर्दैवी असून अनाकलनीय असून मी मात्र कायम उद्धव ठाकरे यांच्या सोबतच राहणार असल्याचे नेवाशाचे आमदार माजी मंत्री शंकरराव गडाख यांनी म्हटले आहे.
धनुष्यबाण चिन्हा बाबत निवडणूक आयोगाने घेतलेली भूमिका याबाबत माजी मंत्री शंकरराव गडाख हे नेवासा येथे आले असता त्यांनी माध्यमांशी बोलतांना ही प्रतिक्रिया दिली. आमदार शंकरराव गडाख म्हणाले की निवडणूक आयोगाने ठाकरे गटाकडून काढून दुसर्या गटाला धनुष्यबाण हे चिन्ह दिले.
त्यामुळे शिवसेना व कार्यकर्ते खचून जातील अशी कोणतीच परिस्थिती नाही. उलट शिवसेना प्रमुख बाळासाहेब ठाकरे यांचे विचार गावागावात व घराघरात नेण्यासाठी शिवसैनिक हे पेटून उठतील. रक्ताचं पाणी करून काम करतील, यासाठी उध्दव ठाकरे जो निर्णय घेतील तो आम्हाला मान्य असेल.
ते जशी वाटचाल करतील, त्यांच्याबरोबर मी भक्कमपणे पाठिशी उभा राहण्याचे काम करणार असल्याची स्पष्ट भूमिका आपण घेतली असल्याचे आमदार शंकरराव गडाख यांनी सांगितले.
