महाराष्ट्र संवाद न्यूज नेटवर्क
पुणे
पिंपरी चिंचवड मतदार संघाच्या पोटनिवडणुकीसाठी रविवारी मतदान होत आहे निवडणुकीचा प्रचार शिगेला पोहोचला असतानाच निवडणूक आयोगाकडून भाजपच्या चिंचवडच्या उमेदवार अश्विनी जगताप यांना पेड न्यूज प्रकरणी नोटीस बजावण्यात आली असल्याची माहिती समोर येत आहे.
पुण्यामध्ये कसबा पेठ आणि चिंचवड मतदार संघासाठी रविवारी पोट निवडणूक होत आहे. नुकत्याच झालेल्या विधान परिषद पदवीधर, शिक्षक मतदार संघाच्या निवडणुकीत मोठ्या पराभवाला सामोर जाव लागल्यानंतर भारतीय जनता पक्षाने या दोन्ही पोट निवडणूक प्रतिष्ठेच्या केल्या आहेत. या दोन्ही जागा बिनविरोध न झाल्याने भाजपचा हिरमोड झाला आहे.
भाजप सोबतच महाविकास आघाडीचे दिग्गज नेते या दोन्ही जागा आपल्या पदरात पाडून घेण्यासाठी प्रचारात उतरले आहे. अशातच चिंचवड मतदार संघा संबंधी आचार संहिता भंगाच्या अनेक तक्रारी निवडणूक आयोगाकडे करण्यात आल्या आहेत. भाजप उमेदवार अश्विनी जगताप यांच्या बद्दलची एक बातमी न्यूज पोर्टल आणि एका साप्ताहिकात प्रकाशित करण्यात आली होती. हा मजकूर पेड न्यूज सारखा असल्याचे एमसीएमसी समितीच्या निदर्शनास आल्याने त्यांनी यासंबंधीचे पत्र निवडणूक निर्णय अधिकारी कार्यालयाला पाठविले होते.
त्यानुसार संबंधित निर्णय अधिकारी सचिन ढोले यांनी १६ फेब्रुवारी रोजी भाजप उमेदवार जगताप यांना नोटीस पाठवत त्यांचे लेखी म्हणणे आयोगाने मागविले होते. उमेदवार अश्विनी जगताप यांनी देखील २० फेब्रुवारीला निवडणूक आयोगाच्या कार्यालयाला यासंबंधीचा खुलासा पाठविला आहे. जगताप यांच्या खुलासाची पडताळणी समितीकडून केल्यानंतर पुढील प्रक्रिया निश्चित केली जाणार असून यासंदर्भात निवडणूक आयोगाकडून काय कारवाई होते याकडे लक्ष लागले आहे.
चिंचवड मध्ये भाजपच्या अश्विनी जगताप राष्ट्रवादीचे नाना काटे आणि अपक्ष उमेदवार राहुल कलाटे यांच्यामध्ये तिरंगी लढत होत असून ही पोट निवडणूक जिंकण्यासाठी भाजप आणि महाविकास आघाडीने आपली संपूर्ण ताकद पणाला लावली आहे. चिंचवड आणि कसबा पेठ मतदार संघात भाजप आणि महाविकास आघाडीकडून मंत्री, स्टार प्रचारकांचे फौज मैदानात उतरविण्यात आली आहे.
दरम्यान कसबा पेठ आणि चिंचवड मध्ये २६ फेब्रुवारीला मतदान होत असून त्यानंतर २ मार्चला दोन्ही पोटनिवडणुकांचे मतमोजणी होणार आहे.
