महाराष्ट्र संवाद न्यूज नेटवर्क
मुंबई
शिर्डीचे संपर्कप्रमुख बबन घोलप यांच्या नेतृत्वाखाली निवडल्या गेलेल्या पदाधिकाऱ्यांच्या निवडीला तत्कालीन जिल्हाप्रमुखांकडून हरकत घेण्यात आल्याने वादाच्या भोवऱ्यात रखडलेल्या नियुक्त्याना अखेर मुहूर्त लाभला आहे. विशेष म्हणजे पक्षांतर्गत राजकारणाला खतपाणी घालणाऱ्या ‘त्या’ पदाधिकाऱ्यांला जबाबदारीतून मुक्त करण्यात आले तर काहींना थेट घरचा रस्ता दाखविण्यात आला आहे. त्यामुळे नव्या निवडींना पक्षात महत्त्व प्राप्त झाले आहे.
एकीकडे शिवसेनेतील मोठ्या बंडानंतर राज्याच्या राजकारणात मोठे बदल होत असताना शिवसेनेत अंतर्गत कुरघोड्यांना देखील उत आल्याने अंतर्गत कलह माजला होता. यातून मार्ग काढण्याचे मोठे आव्हान पक्ष नेत्यांसमोर होते. अखेरीस शिर्डी लोकसभा मतदारसंघातील शिवसेना (उद्धव बाळासाहेब ठाकरे) पक्षाच्या नव्या नियुक्त्या पक्षप्रमुख उद्धव ठाकरे यांच्या आदेशाने पक्षाच्या मध्यवर्ती कार्यालयाकडून जाहीर करण्यात आल्या आहेत.
शिवसेनेचे उत्तर नगर जिल्हाध्यक्ष रावसाहेब खेवरे यांच्या बद्दल शिवसैनिक आणि पदाधिकाऱ्यांमध्ये मोठ्या प्रमाणात नाराजीचे वातावरण होते. या नाराजीचा फटका अनेकदा पक्षाला बसला. खेवरे यांच्या आशीर्वादाने पक्षात मोठ्या प्रमाणात गटबाजी देखील निर्माण झाली होती. पक्ष गटातटाच्या राजकारणात विखुरला गेला होता. खेवरे स्वतः दक्षिण लोकसभा मतदारसंघात असताना त्यांच्यावर शिर्डीची दिलेली जबाबदारी अनेक पदाधिकारी कार्यकर्त्यांना योग्य वाटत नव्हती. तसेच स्वतःच्या राहुरी तालुक्यात नगरपालिका, पंचायत समिती, जिल्हा परिषद आणि बहुतांशी संस्थांमध्ये त्यांना पक्षाचा एकही कार्यकर्ता, पदाधिकारी निवडून आणता आला नसल्याचा तसेच उत्तर येतील प्रस्थापित नेत्यांशी ते हात मिळवणी करत असल्याचा त्यांच्यावर सातत्याने आरोप होत होता.
याची दखल घेत जिल्हाप्रमुख रावसाहेब खेवरे यांना उत्तरेच्या (शिर्डी) जिल्हाध्यक्षपदावरून बाजूला करण्यात आले आहे. नगर दक्षिणचे संपर्कप्रमुख सुनील शिंदे यांचे विश्वासू असलेल्या खेवरे यांना आता नगर दक्षिणच्या सहसंपर्क प्रमुखपदी नेमण्यात आले आहे. तर त्यांच्या जागेवर दोन जिल्हाप्रमुख नेमण्यात आले आहेत. यामुळे खेवरे यांना जिल्हाप्रमुख पदावरून मुक्त करण्यात आल्याने त्यांच्या निवडक समर्थकांमध्ये नाराजीचे वातावरण निर्माण झाले आहे, असे असले तरी यामुळे जिल्ह्यात पक्ष वाढीला चालना मिळण्याची चिन्हे निर्माण झाली आहेत.
कोपरगाव, श्रीरामपूर व नेवासा या तीन तालुक्यांसाठी प्रमोद लबडे आणि संगमनेर, अकोला व राहता (शिर्डी) या तीन तालुक्यांसाठी मुजीब शेख यांची नियुक्ती करण्यात आली आहे. याशिवाय संगमनेरातील शिवसेनेचे जुने जाणते निष्ठावंत पदाधिकारी आप्पा केसेकर यांना जिल्हा संघटक पदी बढती देण्यात आली आहे.
शिवसेना (उद्धव बाळासाहेब ठाकरे) पक्षाच्या मध्यवर्ती कार्यालयाकडून जाहीर करण्यात आलेली जिल्हा कार्यकारिणी पद, नाव आणि कार्यक्षेत्र (कंसात) पुढीलप्रमाणे:
जिल्हा संघटक :
आप्पा केसेकर (शिर्डी लोकसभा)
जिल्हाप्रमुख :
प्रमोद लबडे (कोपरगाव, श्रीरामपूर, नेवासा तालुका),
मुजीब शेख (संगमनेर, अकोला, राहाता (शिर्डी)).उपजिल्हाप्रमुख :
महेश नवले (संगमनेर-अकोले),
शेखर दुभैय्या (श्रीरामपूर शहर),
देवीदास सोनवणे (श्रीरामपूर ग्रामीण)तालुकाप्रमुख :
शिवाजी ठाकरे (कोपरगाव तालुका),
सचिन कोते (राहाता तालुका),
भाऊसाहेब हासे (संगमनेर),
संजय फड (पठार भाग संगमनेर)
राधाकृष्ण बोरकर (श्रीरामपूर तालुका पश्चिम)),
दादा कोकणे (श्रीरामपूर तालुका (पूर्व)),
मनोज मोरे (अकोले तालुका (पूर्व)),
संतोष मुर्तडक (अकोले तालुका (पश्चिम))विधानसभा संघटक :
असलम शेख (कोपरगाव विधानसभा)शहरप्रमुख :
सनी वाघ (कोपरगाव शहर),
संजय शिंदे (शिर्डी शहर),
भागवत लांडगे (राहाता शहर),
नितीन नाईकवाडी (अकोले शहर),
अमर कतारी (संगमनेर शहर),
अतुल शेटे (श्रीरामपूर शहर).शहर समन्वयक :
कलविंदर दडियाल (कोपरगाव शहर).शहर संघटक :
गणेश होले (राहाता शहर).
