अनंत पांगारकर
महाराष्ट्र संवाद न्यूज नेटवर्क
यापूर्वी असलेली दक्षिण-उत्तर अशी शहरप्रमुखांची विभागणी आता पक्षाच्या आदेशावरून रद्द करण्यात आली असून विद्यमान दक्षिणचे शहराध्यक्ष प्रसाद पवार यांना पदावरून मुक्त करण्यात आले असून शहराचे संपूर्ण जबाबदारी अमर कतारी यांच्याकडे सोपविण्यात आली आहे. आठव्यांदा संधी मिळालेले कतारी शिवसेनेचे नवे शहर प्रमुख असतील. पवार यांच्यासह तालुकाप्रमुख असलेले जनार्दन आहेर यांना देखील पदमुक्त करण्यात आले असून त्यांच्या जागेवर नवे तालुका प्रमुख म्हणून भाऊसाहेब हासे आणि संजय फड यांची नियुक्ती करण्यात आली आहे. फड यांना पठार भागाचे तालुकाप्रमुख म्हणून तर हासे यांना उर्वरित संपूर्ण तालुक्याचे तालुकाप्रमुख म्हणून नेमण्यात आले आहे.
मुंबईतील शिवसेनेच्या (उद्धव बाळासाहेब ठाकरे) मध्यवर्ती कार्यालयाकडून शिर्डी लोकसभा मतदारसंघातील पदाधिकाऱ्यांमध्ये मोठे फेरबदल करण्यात आले असल्याची माहिती शिवसेनेचे मुखपत्र दैनिक सामनातून देण्यात आली आहे. या बदलांकडे गेल्या काही महिन्यांपासून पदाधिकाऱ्यांसह निष्ठावंत शिवसैनिकांचे लक्ष लागले होते. मोठ्या राजकीय घडामोडीनंतर या बदलांना अखेर मुहूर्त मिळाला आहे.
विशेष म्हणजे नव्या निवडीमध्ये सातत्याने पदाधिकारी निवडीत वरचष्मा असलेले जिल्हाप्रमुख रावसाहेब खेवरे यांच्याकडून जिल्हाप्रमुख पदाची जबाबदारी काढून त्यांना अहमदनगर दक्षिणच्या सह संपर्कप्रमुख पदी नेमण्यात आल्याने आश्चर्य व्यक्त होत आहे. पक्षांतर्गत त्यांच्यावर दुसऱ्या मतदारसंघाची जबाबदारी सोपविली असली तरी या नव्या निवडीद्वारे त्यांचे पंख छाटल्याचे बोलले जात आहे. त्यामुळे खेवरे यांच्या समर्थकात नाराजीचे वातावरण निर्माण झाले आहे.
शिवसेनेतील बंडानंतर संगमनेर तालुक्यातील पदाधिकारी शिवसैनिकांमध्ये अस्वस्थता निर्माण झाली होती. काही लोकांनी थेट विद्यमान मुख्यमंत्री एकनाथ शिंदे यांची साथ दिली. तर काही लोक मात्र पक्षात राहून पक्ष कमकुवत करण्याचे काम करत होते. त्यातच संपर्कप्रमुख बबन घोलप यांच्या नेतृत्वाखाली शिर्डी मतदार संघाची नवी कार्यकारिणी जाहीर करण्यात आल्याने पक्षात संपर्कप्रमुख आणि जिल्हाप्रमुख असे दोन गट पडले. त्यातून या नव्या कार्यकारिणीला स्थगिती दिली गेली होती. जिल्हाप्रमुख असलेल्या खेवरे यांनी अहमदनगर दक्षिणचे संपर्कप्रमुख सुनील शिंदे यांच्या मध्यस्थीने या नव्या कार्यकारिणीला स्थगिती मिळविली असल्याचे बोलले जात होते. संपर्कप्रमुख आणि जिल्हाप्रमुख असे दोघांचे सरळ सरळ दोन गट पडल्याने जिल्हाप्रमुखांचा पुतळा देखील संगमनेरात जाळला गेला होता. या सर्व पार्श्वभूमीवर नव्या बदलांकडे पदाधिकारी कार्यकर्त्यांचे लक्ष लागले होते.
नव्या नियुक्त्यांमध्ये तालुकाप्रमुख जनार्दन आहेर आणि शहर प्रमुख प्रसाद पवार यांना पदमुक्त करण्यात आले आहे. पवार यांना जबाबदारी मिळाल्यानंतर देखील पक्षात भरीव काम दाखविता आले नाही. संघटना वाढीतही ते अपयशी ठरले. आहेर आणि पवार यांची पदे काढण्यात आल्याने ते कोणती भूमिका घेतात याकडे लक्ष लागले आहे. आहेर यांचे पद यापूर्वीच काढण्यात आले होते. महसूल मंत्री राधाकृष्ण विखे आणि पिचड यांच्याशी असलेले जवळीक आहेर यांच्या पदावर गच्छंती आणणारी ठरली होती. मात्र नव्याने नियुक्त केलेल्या पदाधिकाऱ्यांच्या निवडीला मुंबईतून स्थगिती देण्यात आल्याने ते पदावर कायम होते.
नव्या निवडीमध्ये मुजीब शेख यांना जिल्हाप्रमुख पदावर संधी देण्यात आले असून त्यांच्याकडे संगमनेर अकोल्यासह राहता तालुक्याचे जबाबदारी सोपविण्यात आली आहे. तर संगमनेर अकोलेसाठी महेश नवले यांची उपजिल्हाप्रमुखपदी वर्णी लागली आहे. शिवसेनेतील जुने जाणते नेते आप्पा केसेकर यांना थेट जिल्हा संघटकपदी बढती देण्यात आली. पक्षांतर्गत पदे मिळविण्यासाठी गुडघ्याला बाशिंग बांधून बसलेल्या काही पदाधिकाऱ्यांच्या पदरी निराशा आली आहे. नव्या पदाधिकाऱ्यांवर पक्षाचे संघटन वाढविण्याची, पक्षाचा विचार सामान्यांपर्यंत पोहोचविण्याची जबाबदारी वाढली असल्याचे सांगितले जाते.
