महाराष्ट्र संवाद न्यूज
महाराष्ट्र राज्य उच्च व तंत्र शिक्षण विभाग आणि महाराष्ट्र माहिती तंत्रज्ञान सहाय्यता केंद्र यांच्या संयुक्त विद्यमाने करिअर कट्टा या उपक्रमाचा 2022-23 या शैक्षणिक वर्षाचा उत्कृष्ट राज्यस्तरीय प्राचार्य प्रवर्तक पुरस्कार सहकार महर्षी भाऊसाहेब संतुजी थोरात महाविद्यालयाचे प्राचार्य डॉ. दीनानाथ पाटील यांना मुंबई येथे प्रदान करण्यात आला आहे.
काँग्रेस विधिमंडळ पक्षनेते आमदार बाळासाहेब थोरात व माजी आमदार डॉ. सुधीर तांबे यांच्या मार्गदर्शनाखाली बीएसटी महाविद्यालयाने सातत्याने नवनवीन उपक्रम राबवले असून विद्यार्थ्यांच्या सर्वांगीण व्यक्तिमत्त्व विकासासाठी काम केले आहे. गुणवत्तेबरोबरच विविध उपक्रमामुळे हे महाविद्यालय राज्यपातळीवर लौकिकास्पद ठरले आहे .
नवीन शैक्षणिक धोरणानुसार बिहार व पश्चिम बंगाल या राज्यांप्रमाणे विद्यार्थ्यांना स्पर्धा परीक्षांसाठी सेवाभावी उपक्रमातून सक्षम करणे. स्वयंरोजगारासाठी विद्यार्थ्यांना संपूर्ण देशातील तज्ञांकडून मार्गदर्शन मिळवून देत महाराष्ट्रात करिअर कट्टा हा उपक्रम महाविद्यालय पातळीवर सुरू करण्यात आला आहे. या अंतर्गत सहकार महर्षी भाऊसाहेब थोरात महाविद्यालयाने विविध उपक्रम राबवले असून ही चळवळ पुणे, नाशिक, नगर जिल्ह्यात रुजवण्यासाठी या महाविद्यालयाचे प्राचार्य डॉ. दिनानाथ पाटील, प्रा. नवनाथ नागरे व प्रा. संतोष खामकर यांनी विशेष परिश्रम घेतले. ही योजना प्रभावीपणे राबवल्याबद्दल प्राचार्यांना राज्य पातळीवरील उत्कृष्ट प्राचार्य प्रवर्तक तर प्रा. नागरे यांना उत्कृष्ट तालुका समन्वयक म्हणून गौरविण्यात आले आहे.
या पुरस्काराबद्दल संस्थेचे मार्गदर्शक विधिमंडळ पक्षनेते आमदार बाळासाहेब थोरात, संस्थेचे अध्यक्ष आमदार डॉ. सुधीर तांबे, आमदार सत्यजित तांबे, माजी नगराध्यक्ष दुर्गाताई तांबे, कॅन्सरतज्ञ डॉ. जयश्री थोरात, इंद्रजीत थोरात, सचिव लक्ष्मणराव कुटे, सहसचिव दत्तात्रय चासकर, खजिनदार तुळशीनाथ भोर, रजिस्टर आचार्य बाबुराव गवांदे, उपप्राचार्य डॉ. बाळासाहेब वाघ व प्रा. शिवाजी नवले, नेक समन्वयक प्रा. लक्ष्मण घायवट, कार्यालयीन अधीक्षक गोरक्षनाथ पानसरे आदींसह महाविद्यालयातील विविध विभाग प्रमुख, प्राध्यापक, शिक्षक शिक्षकेतर कर्मचारी व विद्यार्थ्यांनी अभिनंदन केले आहे.
