महाराष्ट्र संवाद न्यूज
कसबा पेठ पोटनिवडणुकीत भाजपाला मोठा धक्का बसला असताना चिंचवडमध्ये मात्र महाविकास आघाडीतील फुटीमुळे भाजपला मोठे यश मिळविता आले. चिंचवडमधून दिवंगत आमदार लक्ष्मण जगताप यांच्या पत्नी अश्विनी जगताप तब्बल ३६०९१ मतांनी विजयी झाल्या आहेत.
कसबा पेठ मतदार संघातील आमदार मुक्ता टिळक यांच्या निधनानंतर झालेल्या पोटनिवडणुकीत त्यांच्या कुटुंबातील उमेदवार न देता भाजपने हेमंत रासने यांना उमेदवारी दिली होती. याचा मोठा फटका भाजपला बसला असताना चिंचवड मध्ये मात्र भाजपने दिवंगत आमदार लक्ष्मण जगताप यांच्या पत्नी अश्विनी जगताप यांना भारतीय जनता पक्षाकडून निवडणुकीच्या मैदानात उतरविले होते.
तर राष्ट्रवादी काँग्रेसकडून नाना काटे यांना उमेदवारी देण्यात आली होती. पिंपरी चिंचवड मधून निवडणूक लढविण्यासाठी राहुल कलाटे इच्छुक होते मात्र त्यांना उमेदवारी नाकारण्यात आल्याने त्यांनी बंडखोरी करत अपक्ष निवडणूक लढविली. काटे आणि कलाटे यांच्यातील मत विभागणीचा फटका महाविकास आघाडीला बसल्याने भाजपच्या अश्विनी जगताप यांचा विजय सुकर झाला. कराटे यांनी उमेदवारी मागे घ्यावी यासाठी अजित पवार, सचिन आहेर अशा बड्या नेते मंडळींनी त्यांची मनधरणी करण्याचा प्रयत्न केला मात्र कलाटे निवडणूक लढविण्यावर ठाम राहिले होते.
कलाटे यांच्या बंडखोरीमुळे या मतदारसंघात तिरंगी लढत झाल्याचे दिसून आले. तरीदेखील जगताप यांनी तब्बल ३६०९१ मतांनी मोठा विजय मिळवला आहे. “हा विजय सर्वसामान्य जनतेला आणि लक्ष्मण जगताप यांना समर्पित करते. भाजपाचे नेते, कार्यकर्ते आणि जनतेला माझ्या पाठीशी उभे राहिल्याबद्दल धन्यवाद देते. अशा पद्धतीने निवडणूक लढवावी लागेल, असा विचार मी कधीच केला नव्हता. लोकांसाठीची लक्ष्मण जगताप यांची अपुरी राहिलेली काम आहेत, ती पूर्ण करण्याचा मी प्रयत्न करणार आहे” अशी प्रतिक्रिया विजयानंतर अश्विनी जगताप यांनी दिली.
निवडणुकीतील अंतिम आकडेवारी अशी;
अश्विनी जगताप – १३५४३४
नाना काटे – ९९३४३
राहुल कलाटे – ४४०८२
