महाराष्ट्र संवाद न्यूज
महाराष्ट्रामध्ये पुण्यात कसबा पेठ आणि पिंपरी चिंचवड या दोन जागांसाठी झालेल्या पोटनिवडणुकीत भाजपने एक जागा गमावली असताना दुसरीकडे भाजपचा मित्रपक्ष असलेल्या केंद्रीय मंत्री रामदास आठवलेंच्या पक्षाने महाराष्ट्राबाहेर नागालँडमध्ये भरारी घेतली आहे. आठवले यांच्या रिपब्लिकन पार्टी ऑफ इंडिया पक्षाचे दोन उमेदवार नागालँडच्या विधानसभा निवडणुकीत विजयी झाले आहेत.
केंद्रीय मंत्री असलेल्या रामदास आठवले यांच्या रिपब्लिकन पार्टी ऑफ इंडियाचा महाराष्ट्रात एकही आमदार नाही. तरी देखील राज्याच्या राजकारणात कायम चर्चेत असलेल्या आठवले यांनी आपल्या पक्षाचे नागालँडमध्ये खाते खोलले आहे. आठवले गटाचे थेट नागालँडमध्ये आमदार निवडून आले आहेत. त्यामुळे आठवले यांची पुन्हा एकदा सगळीकडे चर्चा सुरु झाली आहे.
नागालँडच्या विधानसभा निवडणुकीत एनडीएचा घटकपक्ष असलेली नॅशनल डेमोक्रॅटिक प्रोगेसिव्ह पार्टी (एनडीपीपी) सत्ता स्थापन करण्याच्या मार्गावर आहे. यातच आता रामदास आठवलेंनी थेट नागालँडमध्ये दोन आमदार निवडून आणले असल्याने ते चर्चेत आले आहेत. टूएनसंद सदर – २ विधानसभा मतदारसंघाचे उमेदवार इम्तिचोबा आणि नोकसेन विधानसभा मतदारसंघातून वाय. लिया ओनेने चॅग हे विजयी झाले आहेत.
‘ऊस शेतकरी’ या निशाणीवर रिपल्बिकन पार्टी ऑफ इंडियाच्या आठ उमेदवारांनी नागालँड विधानसभा निवडणूक लढवली होती. त्यातील दोघांचा विजय झाला आहे.
