महाराष्ट्र संवाद न्यूज
शहादा (जि. नंदुरबार)
मी अपक्ष आमदार आहे आणि अपक्षच राहणार असून कर्मचाऱ्यांच्या जुन्या पेन्शन योजनेसाठी आग्रही आहे. मला खात्री आहे या संदर्भात राज्य सरकार आणि अर्थमंत्री देवेंद्र फडणवीस यातून चांगला मार्ग काढतील. या योजनेसाठी राज्य सरकारवर आपण दबाव आणण्याचे काम करणार आहोत, असे नाशिक पदवीधर मतदार संघाचे नूतन आमदार सत्यजित तांबे यांनी सांगितले.
अर्थसंकल्पीय अधिवेशन आदरणीय दोन दिवसाच्या सुट्टीत तांबे मतदारांचे आभार मानण्यासाठी मतदार संघात आले होते. यावेळी शहादा येथे पत्रकारांशी ते बोलत होते.
कर्मचाऱ्यांच्या जुन्या पेन्शन योजनेसाठी आपण आग्रही राहणार असून अर्थसंकल्पीय अधिवेशनादरम्यान विधान परिषदेत पहिल्या चर्चेत आपण हा मुद्दा देखील मांडला असल्याचे आठवण त्यांनी पत्रकारांना करून दिली. शहादा शहरासह तालुक्यात विविध ठिकाणी भेटी देत त्यांनी मतदारांचे आभार मानले. यावेळी त्यांनी पदवीधरांचे आणि शिक्षकांचे प्रश्न सोडविण्याचा आपण सातत्याने प्रयत्न करणार असल्याचा पुनरुच्चार केला.
शहाद्याचे माजी नगराध्यक्ष तथा तालुका एज्युकेशन संस्थेचे अध्यक्ष मोतीलाल पाटील यांच्या निवासस्थानी त्यांनी सदिच्छा भेट दिली. यावेळी त्यांच्यासोबत जिल्हा परिषदेचे माजी सभापती अभिजीत पाटील, प्राचार्य एस. पी. पाटील, लोकशाही आघाडीचे अजबसिंग गिरासे, माध्यमिक शिक्षक संघाचे अध्यक्ष नागेश पटेल, घनश्याम पाटील, अंबालाल पाटील यांच्यासह शहादा तालुका माध्यमिक शिक्षक संघाचे सदस्य, लोकशाही शिक्षक आघाडीचे सदस्य, विविध महाविद्यालयाचे प्राध्यापक उपस्थित होते.
