महाराष्ट्र संवाद न्यूज
अहमदनगर :
अहमदनगर जिल्हा मध्यवर्ती सहकारी बँकेच्या अध्यक्षपदाच्या निवडणुकीत विखे पिता पुत्रांनी घडवून आणलेल्या नाट्यमय घडामोडीनंतर बँक महाविकास आघाडीच्या ताब्यातून निसटली आहे. अनपेक्षितपणे आघाडीच्या मतांची फोडाफोडी करत भारतीय जनता पक्षाने बँक आघाडीच्या ताब्यातून खेचून आणली. बँकेच्या अध्यक्षपदी भाजपचे माजी मंत्री शिवाजीराव कर्डिले यांची निवड झाली.
जिल्हा बँकेचे अध्यक्ष ॲड. उदय शेळके यांच्या आकस्मिक निधनामुळे रिक्त झालेल्या अध्यक्ष पदासाठी बुधवारी संचालक मंडळाची बैठक बोलाविण्यात आली होती. शेळके यांच्या रूपाने अध्यक्षपद राष्ट्रवादी काँग्रेसकडे तर माधवराव कानवडे यांच्या रूपाने उपाध्यक्षपद काँग्रेसकडे होते. काँग्रेस राष्ट्रवादी काँग्रेसचे बँकेवर वर्चस्व असल्याने शेळके यांच्या रिक्त जागी महाविकास आघाडीचे नेते राष्ट्रवादी काँग्रेसचे नेते विरोधी पक्ष नेते अजित पवार आणि माजी मंत्री बाळासाहेब थोरात यांच्या सहमतीने मंगळवारी रात्री माजी आमदार चंद्रशेखर घुले यांचे अध्यक्षपदासाठी नाव निश्चित करण्यात आले होते.
राष्ट्रवादी काँग्रेसकडे सर्वाधिक दहा काँग्रेसकडे तीन विखे गट व भाजपकडे प्रत्येकी तीन आणि शिवसेनेकडे एक असे पक्षीय बलाबल आहे. शेळके यांचे निधन झाल्याने राष्ट्रवादीची सदस्य संख्या नऊवर आली होती. राष्ट्रवादी काँग्रेस-काँग्रेसचे संख्याबळ बारावर असल्याने महाविकास आघाडीला यश निश्चित मानले जात होते. त्यामुळे बुधवारी अध्यक्षपदासाठी घुले यांनी उमेदवारी अर्ज दाखल केल्यानंतर समाज माध्यमांवर त्यांच्या बिनविरोध निवडीचे व अभिनंदनचे मेसेज व्हायरल झाले होते.
मात्र उमेदवारी अर्ज दाखल करण्याच्या अंतिम वेळी भाजपकडून माजी मंत्री शिवाजी कर्डिले यांचा अर्ज दाखल झाल्याने निवडणुकीत काय घडणार याची उत्सुकता वाढली होती. राज्याचे महसूल मंत्री राधाकृष्ण विखे पाटील आणि नगर दक्षिणचे खासदार डॉ. सुजय विखे पाटील यांनी या निवडणुकीत नाट्यमय घडामोडी घडवून आणल्या. घुले आणि कर्डिले यांच्यामध्ये अध्यक्षपदासाठी निवडणूक झाली. गुप्त मतदान पद्धतीने झालेल्या निवडणुकीचा निकाल निवडणूक निर्णय अधिकारी गणेश पुरी यांनी जाहीर केला.
भाजपचे शिवाजी कर्डिले यांना दहा तर राष्ट्रवादी काँग्रेसचे चंद्रशेखर घुले यांना नऊ मते मिळाली. एक मत बाद झाले. त्यामुळे अवघ्या एका मताच्या फरकाने बँक महाविकास आघाडीच्या ताब्यातून निसटली आणि भाजपाच्या ताब्यात गेली. बँकेच्या राजकारणात विखे पिता पुत्रांची खेळी यशस्वी ठरली. त्यांनी अखेरच्या क्षणी महाविकास आघाडीचे मनसुबे उधळून लावले. त्यामुळे पवार-थोरात यांची गणित फिस्कटली. निकालानंतर खासदार डॉ. सुजय विखे पाटील यांनी बँकेत येत अध्यक्ष शिवाजी कर्डिले यांचा सत्कार केला.
