महाराष्ट्र संवाद न्यूज
शुक्रवारी (१० मार्च) निघणाऱ्या शिवजयंती उत्सवाच्या पारंपारिक मिरवणुकीमध्ये संगमनेरकरांनी सहभागी होण्याचे आवाहन शिवसेना (उद्धव बाळासाहेब ठाकरे) पक्षाचे शहर प्रमुख अमर कतारी यांनी केले आहे.
हिंदूहृदयसम्राट सरसेनापती बाळासाहेब ठाकरे मित्र मंडळ, शिवसेना (उद्धव बाळासाहेब ठाकरे) संगमनेर शहर आणि संगमनेरकरांच्या वतीने शुक्रवारी तिथीप्रमाणे होणाऱ्या शिवजयंती उत्सवानिमित्ताने दरवर्षीप्रमाणे यावर्षी देखील पारंपारिक मिरवणूक काढण्यात येणार आहे. संगमनेर नगरपरिषद पटांगणामधून सायंकाळी पाच वाजता ही मिरवणूक निघणार आहे. शहरातील विविध मार्गावरून छत्रपती शिवाजी महाराजांच्या पुतळ्यापाशी रात्री मिरवणुकीचा समारोप होईल.
पारंपारिक मिरवणुकीमध्ये प्रसिद्ध असलेले मोटमल बँड, शिवनेरी येथील ढोल ताशा पथक, निफाड येथील प्रसिद्ध बँड पथक, अहमदनगर येथील संगम बँड पथक, उंट-घोडे, विविध वेशभूषेतील बालक, छत्रपती शिवाजी महाराजांचा सजावटीसह असलेला दहा फूट उंचीचा पुतळा आणि पारंपारिक वाद्याचा समावेश असेल, असे शहरप्रमुख अमर कतारी यांनी सांगितले आहे.
मिरवणुकीमध्ये कोणत्याही प्रकारचे गट तट नसून सर्व संगमनेरकरांचा सहभाग असलेली ही मिरवणूक असेल. संगमनेरकरांनी या मिरवणुकीत सहभाग नोंदवून छत्रपती शिवाजी महाराजांबद्दल आपल्या अस्मिता जोपासाव्या असे देखील आवाहन कतारी यांनी केले आहे.
