महाराष्ट्र संवाद न्यूज
अहमदनगर
वेळे अगोदर उसाचा गळीत हंगाम सुरू केल्याप्रकरणी आमदार रोहित पवार यांच्या इंदापूर तालुक्यातील शेटफळ येथील बारामती ॲग्रो कारखान्याच्या संचालकाविरोधात प्रादेशिक उपसंचालक (साखर) यांनी भिगवण पोलीस ठाण्यात फिर्याद दिली आहे.
आमदार शिंदे यांनी यासंदर्भात विधान परिषदेमध्ये लक्षवेधीच्या अनुषंगाने प्रश्न उपस्थित केला होता. यामुळे अहमदनगर जिल्ह्यातील कर्जत- जामखेड मतदार संघाचे राष्ट्रवादीचे आमदार रोहित पवार आणि याच मतदारसंघातील विधान परिषदेचे भाजप आमदार राम शिंदे यांच्यातील सुप्त संघर्ष पुन्हा एकदा पेटला असल्याचे दिसते. कर्जत जामखेड मतदार संघात गेल्या निवडणुकीत माजी मंत्री व भाजप उमेदवार राम शिंदे यांचा पराभव करून रोहित पवार आमदार झाले होते. तेव्हापासून या दोघांमध्ये संघर्षाचे वातावरण बघायला मिळते.
मुख्यमंत्री एकनाथ शिंदे यांच्या अध्यक्षतेखाली दहा मंत्र्यांच्या उपस्थितीत ऊस हंगाम सुरू करण्यासंदर्भात उच्चस्तरीय बैठक झाली होती. या बैठकीमध्ये गाळपासंबंधी धोरण निश्चित करण्यात आले. बैठकीत पहिला ऊस गाळप हंगाम १५ ऑक्टोंबर पासून सुरू करण्याचे निश्चित झाले होते. मात्र तत्पूर्वीच बारामती ॲग्रो कारखान्याने ऊस गाळप सुरू केले होते. यासंदर्भात आलेल्या तक्रारीची दखल घेत अधिकारी अजय देशमुख यांना २६ डिसेंबरला निलंबित देखील करण्यात आले होते.
दरम्यान गाळप हंगाम नियोजित वेळेच्या अगोदर सुरू केल्याप्रकरणी प्रादेशिक उपसंचालक संजय गोंदे (साखर) यांनी भिगवण पोलीस ठाण्यात फिर्याद दिल्यानंतर बारामती ॲग्रोचे व्यवस्थापकीय संचालक सुभाष गुळवे यांच्यावर गुन्हा दाखल करण्यात आला आहे.
माझ्या तक्रारीवर आता ॲक्शन: राम शिंदे
बारामती ॲग्रो कारखान्याने वेळे अगोदर गरीब सुरू केल्याप्रकरणी ऑक्टोबर महिन्यात मी तक्रार केली होती. त्यावर आता ॲक्शन झाली. विधान परिषदेत देखील लक्षवेधी क्रमांक सातच्या अनुषंगाने या संदर्भात विधान परिषदेच्या उपसभापती नीलम गोर्हे यांच्यासमोर मुद्दा उपस्थित केला होता, असे माजी मंत्री आमदार राम शिंदे यांनी म्हटले आहे.
