महाराष्ट्र संवाद न्यूज
मुंबई
आता ट्रेलर नाही तर गुढीपाडव्याला थेट चित्रपटच दाखविणार, असे संकेत महाराष्ट्र नवनिर्माण सेनेचे अध्यक्ष राज ठाकरे यांनी ठाण्याच्या मेळाव्यात दिले होते. त्यामुळे आज, बुधवारी होणाऱ्या गुढीपाढव्याच्या सभेत राज ठाकरे नेमकी कोणावर तोफ डागणार याकडे राजकीय वर्तुळासह सर्वांचेच लक्ष लागले आहे.
शिवसेनेच्या दसरा मेळाव्याच्या धर्तीवर राज ठाकरे यांचा गुढी पाडवा मेळावा होत असतो. शिवसेनेच्या दसरा मेळाव्याप्रमाणेच या मेळ्याव्याचीही जय्यत तयारी केली जाते. मुंबईसह राज्यभरातील मनसैनिक पदाधिकारी या मेळाव्याला हजेरी लावत असतात. महाराष्ट्र नवनिर्माण सेनेसाठी हा मेळावा महत्त्वाचा असतो. बुधवारी संध्याकाळी होत असलेल्या या मेळाव्यात राज ठाकरे नेमकी कोणावर टीका करणार याकडे सर्वांचेच लक्ष लागले आहे.
महापालिका निवडणुका कधीही लागू शकतात. आपण सत्तेपासून दूर नाही. त्यामुळे तयारीला लागा. आपली सत्ता येणार आहे, असे फर्मान राज ठाकरे यांनी ठाणे येथील मेळाव्यात कार्यकर्त्यांसाठी जारी केले होते. राज्यात काही महिन्यांपूर्वीच सत्ता बदल झाला. तत्कालीन मुख्यमंत्री उद्धव ठाकरे यांच्या नेतृत्वाखालील शिवसेनेत मोठी फूट पडली. शिवसेना नाव आणि धनुष्यबाण चिन्ह मुख्यमंत्री एकनाथ शिंदे यांच्या गटाला मिळाले आहे. महाराष्ट्रातील सत्ता संघर्षाची सुनावणी देखील नुकतीच पूर्ण झाली आहे. सुनावणीनंतर सर्वोच्च न्यायालयाने यावरील निकाल राखून ठेवला आहे. सत्ता संघर्षाची लढाई कोण जिंकणार याचा निर्णय येणे बाकी असतानाच मनसेचा मेळावा होत असून या पार्श्वभूमीवर राज ठाकरे काय बोलतात याकडे लक्ष लागले आहे.
सध्या सुरू असलेल्या अर्थसंकल्पीय अधिवेशनात शिंदे-फडणवीस सरकारने महिलांसाठी एसटी प्रवासात ५० टक्के सवलत लागू केली आहे. मुंबईचा कायापालट करण्यासाठी विविध योजना जाहिर करण्यात आल्या आहेत. असे अनेक मुद्दे सध्या चर्चेत आहेत. त्यामुळे यातील कोणत्या मुद्द्यावरुन राज ठाकरे हे सरकारला घेरतील ती सरकारच्या भूमिकेचे स्वागत करतील हे बघावे लागेल.
याशिवाय विरोधक व सत्ताधारी यांच्यामध्ये कलगीतुरा सुरु असतो. शिवसेनेच्या दोन गटातही आरोप प्रत्यारोपाच्या फैरी सुरू असतात. त्यावर राज ठाकरे नेमके काय भाष्य करणार याकडेही सर्वांचे लक्ष लागले आहे. त्यामुळे गुढी पाडव्याच्या मेळाव्यात राज ठाकरे कार्यकर्त्यांना कोणता कानमंत्र देणार याचीही सध्या चर्चा सुरु आहे.
