महाराष्ट्र संवाद न्यूज
संगमनेर:
श्रीराम नवमी निमित्ताने संगमनेरमध्ये विश्व हिंदू परिषद, बजरंग दल, दुर्गावाहिनी मातृशक्ती आयोजित “भव्य दिव्य शोभायात्रा” गुरुवारी (३० मार्च) सायंकाळी पाच वाजता संगमनेर येथील अभिनव नगरमधील श्रीराम मंदिर येथून निघणार आहे.
श्रीरामचंद्र यांचा जन्मोत्सव गुरुवारी दुपारी बारा वाजता संगमनेर तालुक्यातील सर्व प्रमुख मंदिरे, श्रीराम मंदिरे व हनुमान मंदिरात जन्मोत्सवाचे विविध कार्यक्रम विश्व हिंदू परिषदेने आयोजित केले आहे. सायंकाळी निघणाऱ्या शोभायात्रेत भव्य दिव्य धार्मिक देखावे, भव्य श्रीरामचंद्र मूर्ती, प्रमुख आकर्षण “महाबली हनुमान”, श्रीराम रथ, श्रीराम पंचायत, भजनी मंडळ, सनई- चौघडे, घोडे, पारंपारिक वाद्य, आकर्षक रोषणाई, फटाक्यांची आतिषबाजी अशी भव्य- दिव्य शोभायात्रा काढण्यात येणार आहे.
शोभायात्रा अभिनव नगर येथून निघणार असून ती नवीन नगर रोड, छत्रपती शिवाजी महाराज स्मारक, चावडी, मेनरोड, सय्यद बाबा चौक, तेलीखुंट, नेहरू चौक, चंद्रशेखर चौक येथील मोठे मारुती मंदिर व शेवटी श्रीराम मंदिर येथे पोहोचेल. तेथे महाआरती होवून शोभायात्रेची सांगता होईल.
भव्य दिव्य शोभायात्रेत सर्व हिंदू बंधू-भगिनींनी मोठया संख्येने उपस्थित राहण्याचे आवाहन करण्यात आले आहे. विहिंप दुर्गावाहिनी मातृशक्तीतर्फे येणाऱ्या सर्व भगिनींना भगवे फेटे बांधण्यात येणार आहे, अशी माहिती विश्व हिंदू परिषद बजरंग दलाने प्रसिद्धी पत्रकाद्वारे दिली आहे.
