महाराष्ट्र संवाद न्यूज
संगमनेर शहर आणि परिसरामध्ये गुरुवारी राम नवमी उत्सव मोठ्या जल्लोषात साजरा करण्यात आला. सायंकाळी शहरातील प्रमुख मार्गावरून आयोजित करण्यात आलेल्या शोभायात्रेत नागरिक मोठ्या संख्येने सहभागी झाले होते. आजी-माजी मंत्र्यांसह विद्यमान आमदारांच्या सहभागामुळे शोभा यात्रेची रंगत आणखी वाढली होती.
श्रीराम नवमी निमित्ताने विश्व हिंदू परिषद बजरंग दल, दुर्गावाहिनी-मातृशक्ती आयोजित शोभायात्रेला अभिनव नगर मधील श्रीराम मंदिरात सायंकाळी साडेपाच वाजता हनुमान चालीसा व आरतीने सुरुवात करण्यात आली. गीता परिवाराच्यावतीने यावेळी हनुमान चालीसांचे वाटप करण्यात आले.
बस स्थानक परिसरात रामराज्य प्रतिष्ठानने केलेली विद्युत रोषणाई पाहण्यासाठी संगमनेरकरांनी गर्दी केली होती. शोभायात्रेत सुरुवातीला सनई चौघडे, घोडे, उंट, लहान मुले श्रीराम, सीतामाई, लक्ष्मण, हनुमान, शबरी वेशभूषेत श्रीराम पंचायत आकर्षक बग्गीत बसले होते. पारंपरिक वाद्य शिवजन्म भुमि जुन्नर महाराणा ढोल ताशा पथक, साईदर्शन डि.जे., गजराज डि. जे. पुढे तरुणांनी श्रीरामांच्या गाण्यांवर ठेका धरला होता.
शोभायात्रेत भव्य- दिव्य धार्मिक देखावे, भव्य श्रीरामचंद्र मूर्ती, “भव्य महाबली हनुमान” लहान मुलांसाठी आकर्षण ठरले होते, महाबली हनुमान पाहण्यासाठी मोठी गर्दी झाली होती. आदीवासी नृत्य, मर्दानी खेळ व मल्लखांब प्रात्याषिके चौका-चौकात पाहण्यासाठी मोठी गर्दी झाली होती.
आकर्षक रोषणाई, फटाक्यांची आतिषबाजी यावेळी करण्यात आली. शोभायात्रेत सहभागी झालेल्या संगमनेरकरांची उपस्थिती लक्षणीय होती. प्रभू श्रीराम यांच्या जयघोषाने संगमनेर नगरी दुमदुमली होती. पोलीस निरीक्षक भगवान मथुरे यांच्या नेतृत्वाखाली शहरात सर्वत्र तसेच मिरवणूक मार्गावर मोठ्या प्रमाणात बंदोबस्त तैनात करण्यात आला होता. रात्री दहा वाजता सय्यद बाबा चौकात शोभायात्रा असताना पोलिसांनी वाद्य बंद केले.
आजी-माजी मंत्र्यांसह विद्यमान आमदारांचा सहभाग
राज्याचे महसूल व जिल्ह्याचे पालकमंत्री राधाकृष्ण विखे पाटील मिरवणुकीमध्ये छत्रपती शिवाजी महाराजांच्या पुतळ्यापाशी उपस्थित होते. याच ठिकाणी नाशिक पदवीधर मतदारसंघाचे अपक्ष आमदार सत्यजित तांबे यांनी देखील मिरवणुकीत हजेरी लावली. मंत्री विखे पाटील आणि आमदार सत्यजित तांबे काही काळासाठी एकत्र होते. दोघांनी छत्रपती शिवाजी महाराज आणि डॉक्टर बाबासाहेब आंबेडकर यांच्या पुतळ्यांना पुष्पहार अर्पण केले तसेच छत्रपती शिवाजी महाराज पुतळ्यासमोरील मारुती मंदिर आणि पंजाबी कॉलनी येथे एकत्रित आरती करत दोघांनीही हातात- हात घेवून शोभायात्रेत सहभाग घेतला. त्यानंतर राज्याचे माजी मंत्री विद्यमान आमदार बाळासाहेब थोरात माजी नगराध्यक्ष दुर्गाताई तांबे यांनी सय्यद बाबा चौकात मिरवणुकीत सहभाग घेतला होता. रात्री चंद्रशेखर चौक येथील पुरातन मारुती मंदिर व श्रीराम मंदीर येथील रामभक्ती रंग कार्यक्रमात विखे-तांबे सहभागी झाले.
