महाराष्ट्र संवाद न्यूज
संगमनेर: उभी हयात सामाजिक योगदान देणारे ज्येष्ठ नागरिक हे खऱ्या अर्थाने श्रेष्ठ आहेत. ज्या संस्कृतीमध्ये संवेदनशीलतेने ज्येष्ठांना सन्मान दिला जातो, ती संस्कृती जगाला विश्वशांतीची दिशा देणारी ठरेल, असे प्रतिपादन प्राचार्य भगवान जोशी यांनी केले.
इनरव्हील क्लब ऑफ संगमनेर तर्फे ज्येष्ठ नागरिक महासंघाच्या ५० नागरिकांना आधारवड कृतज्ञता समारंभात छत्री व काठी देऊन सन्मानित करण्यात आले. यावेळी जोशी बोलत होते. अध्यक्षस्थानी राष्ट्रपती पुरस्कार प्राप्त सोमनाथ कळसकर गुरुजी होते. व्यासपीठावर इनरव्हील डिस्ट्रिक्टच्या अध्यक्ष रचना मालपाणी, अध्यक्ष वृषाली कडलग, नगराध्यक्ष दुर्गाताई तांबे, सेक्रेटरी ज्योती पलोड आदी उपस्थित होते. अनिता कोदे व विजय कोदे यांनी छत्री व काठी दिल्याबद्दल त्यांचा सन्मान करण्यात आला.
जोशी म्हणाले, ज्येष्ठांसाठी ‘म्हातारा’ हा शब्द वापरला जातो. मात्र ते म्हातारे नसून तेजस्वीपणे चकाकणारे ‘महातारे’ आहेत. या महाताऱ्यांच्या सत्कार्यातून जी ऊर्जा निर्माण होते, त्यावर जग चालते. या ज्येष्ठांची संवेदनशीलतेने दखल घेणाऱ्या इनरव्हील क्लबचे कार्य गौरवास्पद आहे.
दुर्गाताई तांबे म्हणाल्या, इनरव्हीलने ज्येष्ठ नागरिकांची घेतलेली दखल ही स्वार्थ विरहित सेवा आहे. समाजासाठी विविध उपक्रम राबविणाऱ्या इनरव्हीलने जागतिक पातळीवर केलेले सामाजिक कार्य गौरवास्पद ठरले आहे.
रचना मालपणी म्हणाल्या, जेष्ठांची सेवा करण्याचे सदभाग्य इनरव्हीलला मिळाले आहे. प्रास्ताविक भाषणात इनरव्हीलच्या अध्यक्ष वृषाली कडलग यांनी कार्यक्रमाचा उद्देश स्पष्ट केला. ज्येष्ठ नागरिक हे समाजाचे मार्गदर्शक व आधारस्तंभ आहेत. ज्या देशाला अध्यात्मिक अधिष्ठान असते त्या देशात ज्येष्ठांचा सन्मान होतो व ती संस्कृती जगामध्ये उन्नत ठरते असे त्या म्हणाल्या.
‘खरा तो एकची धर्म जगाला प्रेम अर्पावे’ या प्रार्थनेने कार्यक्रमाची सुरुवात तर सांगता पसायदानाने झाली. कार्यक्रमप्रसंगी इनरव्हीलच्या सीमा अत्रे, ज्योती कासट, डॉ. दीप्ती राजुस्कर, संध्या मालपाणी, वैशाली खैरनार, शुभलक्ष्मी बेलापूरकर, शिल्पा नावंदर, सुनिता गांधी आदी उपस्थित होत्या. सूत्रसंचालन नंदकिशोर बेल्हेकर यांनी तर आभार नवले सर यांनी मानले.
