महाराष्ट्र संवाद न्यूज
शुक्रवारी संगमनेर कृषी उत्पन्न बाजार समिती सार्वत्रिक निवडणुकीसाठी मतदान पार पडले. शांततेत आणि उत्साहात झालेल्या या निवडणुकीत 97.12 टक्के मतदान झाले.
संगमनेरच्या जनता नगर मधील राजमाता जिजाऊ शाळेमध्ये शुक्रवारी सकाळी मतदानाला प्रारंभ झाला सायंकाळी चार वाजता मतदान संपले इतर शनिवारी सकाळी याच शाळेमध्ये मतमोजणी होणार असल्याची माहिती देण्यात आली आहे.
एकूण 3614 मतदारांपैकी 3510 मतदारांनी मतदानाचा हक्क बजावला. संगमनेर कृषी उत्पन्न बाजार समितीवर राज्याचे माजी मंत्री आमदार बाळासाहेब थोरात यांचे वर्चस्व आहे. त्यांच्याच नेतृत्वाखाली महाविकास आघाडी पुरस्कृत शेतकरी विकास मंडळ आणि राज्याचे विद्यमान महसूल मंत्री राधाकृष्ण विखे पाटील यांच्या नेतृत्वाखाली जनसेवा मंडळामध्ये सरळ लढत झाली. कृषी उत्पन्न बाजार समिती मध्ये दोघा आजी-माजी महसूल मंत्र्यांच्या समर्थकांमध्ये लढत झाली असून या सर्वांचे भवितव्य मतपेटीत बंद झाले आहे.
मंत्री राधाकृष्ण विखे पाटील यांनी शेतकरी मंडळाच्या माध्यमातून स्वतंत्र पॅनल उभा करत संगमनेर कृषी उत्पन्न बाजार समिती निवडणुकीत माजी मंत्री आमदार बाळासाहेब थोरात यांना शह देण्याचा, तर राहता कृषी उत्पन्न बाजार समिती थोरात यांनी महाविकास आघाडी पुरस्कृत शेतकरी विकास मंडळाचा पॅनल उभा करत विखे यांना शह देण्याचा प्रयत्न केला आहे. त्यामुळे या दोन्ही बाजार समितीमध्ये आजी-माजी महसूलमंत्र्यांमध्ये वर्चस्वाची लढाई दिसून आली. संगमनेरमध्ये आमदार बाळासाहेब थोरात, माजी आमदार डॉ. सुधीर तांबे, माजी नगराध्यक्ष दुर्गाताई तांबे आपल्या समर्थकांसह मतदान केंद्रावर उपस्थित होते.
कृषी उत्पन्न बाजार समितीसाठी झालेले मतदान खालीलप्रमाणे
सोसायटी – 96.83%
ग्रामपंचायत -98.63%
हमाल मापाडी -100%
व्यापारी – 92%
