संगमनेर (महाराष्ट्र संवाद न्यूज)
सामाजिक जाणीव आणि संवेदना जागृत ठेवत शिक्षक सुनील कडलग व अनिल कडलग, लता पुष्पा व उषा या भावंडांनी आपल्या आईच्या प्रथम स्मृतिदिनानिमित्ताने रूढी परंपरा बाजूला ठेवत स्वामी विवेकानंद वाचनालय आणि आधार संस्थेस देणगी दिली. याचबरोबर विचारवंत प्रा. सोपानराव देशमुख यांच्या व्याख्यानाचे आयोजन करून प्रेरणादायी कार्य केले.
रोटरी आय केअर ट्रस्टचे विश्वस्त, जवळे कडलग येथील स्वामी विवेकानंद वाचनालयाचे संस्थापक सुनील कडलग आणि आधार संस्थेमार्फत सामाजिक काम करणारे अनिल कडलग यांच्या मातोश्री शकुंतला किसन कडलग यांचे सोमवारी (ता.8) प्रथम पुण्यस्मरण होते.
आयुष्यभर सामाजिक जाण व भान जपणाऱ्या आईचा स्मृतीजागर हा प्रा. सोपानराव देशमुख यांचे व्याख्यान आयोजित करून व जवळे कडलग येथील स्वामी विवेकानंद वाचनालयास रुपये २१ हजाराची देणगी आणि अनाथ मुलांना शिक्षणासाठी मदत करणाऱ्या आधार या सामाजिक संस्थेला ११ हजाराची देणगी देऊन आईच्या स्मृती जतन करण्याचा निर्णय सुनील कडलग, अनिल कडलग, त्यांच्या भगिनी लता कवडे, पुष्पा देशमुख, उषा मोराडे आणि वृषाली व मंदा कडलग यांनी घेतला.
यावेळी बोलताना देशमुख म्हणाले, आजपर्यंत हिंदू धर्म संस्कृतीने अस्पृश्यांना काळाराम मंदिरामध्ये प्रवेश नाकारला ही फार मोठी चूक झाली. आता आपल्याला समाज व्यवस्था बदलावी लागेल व आपल्याला आपले म्हणण्याची दानत दाखवावी लागेल. रामायण लिहिणारा वाल्या कोळी हा आदिवासी होता हे विसरता येणार नाही. त्याचबरोबर महाभारत लिहिणारा व्यास हा एका मासे पकडणाऱ्या आदिवासी महिलेचा मुलगा होता. चुकीने मुस्लिम झालेला नेताजी पालकर यास छत्रपती शिवाजी महाराजांनी पुन्हा हिंदू धर्मात सामावून घेतले याचे अनुकरण आपण केले पाहिजे.
हिंदू धर्मातच जर आंतरजातीय विवाह होत असतील तर त्याचा स्वीकार करून आपण आता समाजव्यवस्था बदलत आहे हा संदेश दिला पाहिजे. हिंदवी स्वराज्याचे संस्थापक छत्रपती शिवाजी महाराज, अस्पृश्यता निर्मूलन करण्यासाठी लढा देणारे शाहू महाराज, स्री शिक्षणासाठी आयुष्य वेचणारे महात्मा फुले, आणि देशाला राज्यघटना देणारे डॉ. बाबासाहेब आंबेडकर हे आपले आधारस्तंभ आहेत. त्यांच्या विचारांचे अनुकरण आपण केले पाहिजे.
जवळे कडलग येथील स्वामी विवेकानंद सार्वजनिक वाचनालयास दिलेली देणगी वाचनालयाचे संचालक, जवळे कडलगचे उपसरपंच निलेश कडलग, प्रताप कडलग, गोकुळ खडांगळे, सुनील महाले व भाऊसाहेब गोसावी यांनी स्वीकारली तर आधार फाउंडेशनला दिलेली देणगी प्रभाकर सोनवणे, डॉ. महादेव अरगडे, लक्ष्मण कोते, सुखदेव इल्हे यांनी स्विकारली. यावेळी शिक्षक बँकेच्या संचालिका सरस्वती घुले, मनीषा शिंदे, सुनील घुले, सुभाष ताजणे, डॉ. महादेव अरगडे, प्रा. चं. का. देशमुख, भाऊसाहेब गायकर, प्रा. राधाकृष्ण आरोटे, तान्हाजी कवडे, विलास देशमुख, नानासाहेब मोराडे, डॉ. चित्रलेखा देशमुख, वैशाली देशमुख उपस्थित होते.
सूत्रसंचालन विठ्ठल कडूसकर यांनी केले. उपसरपंच निलेश कडलग यांनी आभार मानले.
