संगमनेर (महाराष्ट्र संवाद न्यूज)
संगमनेर बस स्थानकाजवळचा हॉटेल कश्मीर समोरील अनधिकृत रिक्षा स्टॉप बंद करण्याची मागणी विश्व हिंदू परिषद व बजरंग दल संघटनेच्यावतीने प्रादेशिक परिवहन कार्यालय श्रीरामपूर, संगमनेर शहर पोलीस स्टेशन, संगमनेर नगरपालिका प्रशासनाकडे करण्यात आली आहे.
या अनधिकृत रिक्षा स्टॉपजवळ राजू आखाडे यांची अल्पवयीन मुलगी उन्हाच्या तीव्रतेने भोवळ येवून पडली असता, या रिक्षा स्टॉप वरील रिक्षा चालकांनी बघ्याची भूमिका घेतली. दरम्यान याचवेळी येथून योगेश सूर्यवंशी, विशाल वाकचौरे, दिपक रणशेवरे जात होते. त्यांनी मुलगी तीव्र उन्हात रस्त्यावर पडलेली पाहिली, त्यांनी तिला तत्परतेने सावलीत नेवून पाणी पाजले, तरीही तिला अस्वस्थ वाटत होते.
त्यामुळे या तिघांनी संयमाची भूमिका घेवून तिला दवाखान्यात नेण्याची व त्यासाठीचे रिक्षा भाडे देण्याची विनंती या स्टॉपवरील रिक्षा चालकांकडे केली. परंतु या मुजोर रिक्षा चालकांनी त्यांच्या विनंतीला दाद दिली नाही. उपचारासाठी मुलीला रुग्णालयात नेण्यास टाळाटाळ करत कोणतेही पॅसेंजर नसतांना आम्हांला नंबर आहे, असे सांगितले. अश्या आमच्या समोर रोजच घटना घडत असतात. आम्ही काय ठेका घेतला का? आम्हांला त्या मुलीशी काही देणे घेणे नाही. अशी रिक्षा चालकांनी भूमिका घेतली.
त्यामुळे या तिघांनी चिडून रस्त्यावर जाणारी रिक्षा अडवली, त्यात मुलीला बसवले. तिला तिच्या घरी नेले. तिच्या घरच्यांशी चर्चा केल्यानंतर घरच्यांनी तिला दवाखान्यात नेले. सामाजिक जाणिवेतून मदत करण्याऐवजी उलट रस्त्यात अडथळा निर्माण करून आपणच रस्त्याचे मालक असल्यासारखे वागणाऱ्या रिक्षाचालकांमुळे या ठिकाणी वाहतुकीला देखील मोठा अडथळा निर्माण होत असतो.
या रिक्षा स्टॉपच्या रिक्षा चालकांकडे बॅच बिल्ला आहे की नाही हे तपासणे गरजेचे आहे. तसेच परवाना नसलेल्या स्क्रॅप स्थितीत असलेल्या रिक्षा या ठिकाणी प्रवासी वाहतुकीसाठी वापरल्या जातात. वाहतूक पोलिसांसमोरूनच अशा प्रकारच्या रिक्षांमधून प्रवासी वाहतूक होत असताना देखील त्यांना रोखले जात नाही. या रिक्षा स्टॉपमुळे अनेक अपघात होतात. हे रिक्षा चालक टोळक्याने उभे राहून महिला-मुलींची टिंगल टवाळी करतात. शालेय विद्यार्थिनींना पुढे शेजारी बसवतात. जाणीवपूर्वक स्पर्श करतात. रात्रीच्या वेळी अवास्तव भाडे आकारतात.
या संदर्भात यापूर्वीही एकलव्य संघटनेचे प्रदेशाध्यक्ष योगेश सूर्यवंशी यांनी तक्रार केली होती. त्यावेळी प्रादेशिक परिवहन कार्यालय, श्रीरामपूर यांनी जुजबी कारवाई केली होती.
