जामखेड (महाराष्ट्र संवाद न्यूज)
कृषी उत्पन्न बाजार समिती निवडणुकीमध्ये समसमान जागा मिळविणाऱ्या भाजप आणि राष्ट्रवादीमध्ये झालेल्या सभापती, उपसभापतीपदाच्या निवडीत ईश्वर चिट्ठीने सभापतीपदाची माळ भाजपच्या तर उपसभापतीपदाची माळ राष्ट्रवादीच्या गळ्यात टाकली आहे. सभापती उपसभापती निवडणुकीत दोन्ही उमेदवारांना समसमान मते पडल्याने ईश्वर चिट्ठीचा कौल घेण्यात आला यात सभापतीपती भाजपचे शरद कार्ले तर उपसभापतीपदी विखे समर्थक कैलास वराट निवडून आले आहेत.
जामखेड कृषी उत्पन्न बाजार समितीमध्ये विखे गटाने राष्ट्रवादीसोबत केलेल्या युतीनंतर झालेल्या निवडणुकीत भाजपचे नेते प्रा. राम शिंदे यांच्या गटाने नऊ तर राष्ट्रवादीचे राळेभात आणि विखे यांच्या युतीने नऊ जागा मिळविल्या होत्या. यात राळेभात गटाला साथ तर त्यांच्याबरोबर युती केलेल्या विखे यांच्या गटाला दोन जागा मिळाल्या होत्या. समसमान जागांमुळे बाजार समितीच्या सभापती उपसभापती पदी कोणाची वर्णी लागते, याकडे नगर जिल्ह्यासह राज्याचे लक्ष लागले होते.
मंगळवारी सभापती उपसभापती निवडीसाठी झालेल्या बैठकीत सभापतीपदासाठी भाजप प्रणित राम शिंदे यांच्या गटाकडून शरद कार्ले तर राळेभात यांच्या गटाकडून माजी सभापती सुधीर राळेभात यांनी अर्ज दाखल केले होते. उपसभापती पदासाठी शिंदे यांच्या गटाकडून सचिन घुमरे यांनी तर राळेभात यांच्या गटाकडून विखे समर्थक कैलास वराट यांनी उमेदवारी अर्ज दाखल केले होते. निवडणूक प्रक्रिया नंतर समसमान मते मिळाल्याने सभापती उपसभापती निवडीसाठी ईश्वर चिट्ठीचा कौल घेण्यात आला.
यामध्ये सभापतीपदी भाजपचे शरद कार्ले विजयी ठरले. तर उपसभापतीपदी राष्ट्रवादीच्या राळेभात गटाकडून उमेदवारी केलेले विखे समर्थक कैलास वराट यांना ईश्वर चिट्ठीने कौल दिला.
