संगमनेर (महाराष्ट्र संवाद न्यूज)
संगमनेर तालुक्यात पार पडलेल्या ग्रामपंचायत पोटनिवडणुकीत महसूल मंत्री राधाकृष्ण विखे पाटलांच्या बालेकिल्ल्यातील आश्वीच्या शिबलापूरसह सर्व जागांवर आमदार थोरात समर्थकांनी मोठा विजय मिळवला आहे. यामुळे तालुक्यातील सर्वच्या सर्व ग्रामपंचायतींवर पोट निवडणुकीच्या माध्यमातून आपले निर्विवाद वर्चस्व कायम ठेवण्यात थोरात यशस्वी झाले आहे.
तालुक्यातील शिबलापुर, पिंपळगाव देपा, पोखरी हवेली, नांदुरी दुमाला या गावांमधील पाच जागांकरता पोटनिवडणुका झाल्या. यामध्ये आश्वी गटातील शिबलापूर ग्रामपंचायत पोटनिवडणूकीत आमदार थोरात गटाच्या गितांजली संदीप मुन्तोडे व करुणा सागर मुन्तोडे मोठ्या मताधिक्याने विजयी झाले.
तर पिंपळगाव देपामधून नाना बाळशीराम गांजवे, पोखरी हवेलीमधून घुले संचिता दिनकर व नांदुरी दुमाला येथून वैशाली अमोल कराळे विजयी झाले आहेत. हे सर्व उमेदवार आमदार बाळासाहेब थोरात गटाचे आहेत.
या सर्व उमेदवारांचे यशोधन जनसंपर्क कार्यालयात काँग्रेस विधिमंडळ पक्षनेते आमदार बाळासाहेब थोरात व युवा नेत्या कॅन्सरतज्ञ डॉ. जयश्रीताई थोरात यांच्या हस्ते सत्कार करण्यात आला .यावेळी विविध संस्थांचे पदाधिकारी उपस्थित होते.
यावेळी सर्व कार्यकर्त्यांनी आमदार बाळासाहेब थोरात जिंदाबादच्या घोषणा देवून परिसर दुमदुमून टाकला. गुलाल आणि फटाक्यांच्या आतिषबाजी करत सर्व उमेदवारांनी आपला विजय साजरा केला.
