कोपरगाव (महाराष्ट्र संवाद न्यूज)
वाळू वाहतूक करणाऱ्या तक्रारदाराच्या वाहनावर महसूल विभागाने कोणतीही कारवाई करू नये यासाठी, कोपरगावचे तहसीलदार विजय बोरुडे यांच्या सांगण्यावरून २० हजार रुपयांच्या लाचेची रक्कम स्वीकारणाऱ्या खासगी इसम गुरमीत सिंग दडियाल (वय ४० वर्ष, रा. कोपरगाव) याला नासिक एसीबीने रंगेहात पकडले. दडियाल आणि तहसीलदार विजय बोरुडे यांच्या विरोधात कोपरगाव पोलीस ठाण्यात गुन्हा दाखल करण्यात आला.
कोपरगावमध्ये थेट तहसीलदारांवरच एसीबीचा ट्रॅप झाल्याने जिल्ह्यातील ही मोठी कारवाई मानली जात आहे. कोपरगाव येथील तक्रारदार यांच्या वाळू वाहतूक करणाऱ्या वाहनावर महसूल विभागाने कोणत्याही प्रकारची कारवाई करू नये याकरीता, कोपरगावचे तहसीलदार विजय बोरुडे (वय ४४ वर्षे, रा. कोपरगाव) यांनी वीस हजार रुपये लाचेची मागणी केली होती. त्यामुळे तक्रारदाराने यासंदर्भात नाशिक एसीबीसी संपर्क करत तक्रार दाखल केली होती. तक्रारदाराच्या तक्रारीची पडताळणी केल्यानंतर नाशिक एसीबीच्या अधिकाऱ्यांनी लाचखोरांना पकडण्यासाठी कोपरगाव तहसील कार्यालयाच्या आवारात शुक्रवारी संध्याकाळी सापळा लावला होता.
तहसीलदार विजय बोरुडे यांच्या सांगण्यावरून त्यांचे निकटवर्तीय गुरुमित सिंग दडियाल याला शुक्रवारी (ता. १९ मे) संध्याकाळी सात वाजण्याच्या सुमारास तक्रारदाराकडून लाच स्वीकारताना पथकाने रंगेहात पकडले. दडियाल यांने तहसीलदार बोरुडे यांच्यासाठी ही लाच स्वीकारल्याचे मान्य केले असून तहसीलदार बोरुडे यांनी लाचेची रक्कम घेण्यास दडीयाल यांस प्रोत्साहन दिल्याबद्दल दोघांनाही लाचलुचपत प्रतिबंधक विभागाने ताब्यात घेतले.
नासिक एसीबीच्या पोलीस अधीक्षक शर्मिष्ठा घारगे-वालावलकर, अप्पर पोलीस अधीक्षक नारायण न्याहाळदे, पोलीस अधीक्षक नरेंद्र पवार यांच्या मार्गदर्शनाखाली पोलीस उपाधीक्षक वैशाली पाटील यांच्यासह सापळा अधिकारी पोलीस निरीक्षक संदीप साळुंखे, पोलिस हवालदार पंकज पळशीकर, पोलीस नाईक नितीन कराड, प्रवीण महाजन, प्रभाकर गवळी, संतोष गांगुर्डे यांच्या पथकाने ही कारवाई केली.
महसूलमंत्र्यांच्या भूमिकेकडे लागले लक्ष…
अवैध वाळू तस्करी थांबविण्यासाठी राज्यात नवे वाळू धोरण आणणाऱ्या महसूल मंत्र्यांच्या जिल्ह्यात महसूलचे अधिकारी खुलेआम लाचखोरी करत असल्याने राज्याचे महसूल मंत्री राधाकृष्ण विखे पाटील यासंदर्भात काय भूमिका घेतात याकडे लक्ष लागले आहे.
आवाहन…
लाचलुचपत प्रतिबंधक विभाग नाशिक यांच्या वतीने सर्व नागरिकांना आवाहन करण्यात आले की ज्या कोणाकडे कोणत्याही विभागाचा शासकीय अधिकारी अथवा कर्मचारी किंवा त्यांच्या वतीने खाजगी माणूस शासकीय काम करून देण्याच्या मोबदल्यात लाचेची मागणी करत असल्यास तत्काळ ०२५३ २५७८२३० व ०२५३ २५७५६२८ या दूरध्वनी क्रमांकावर अथवा १०६४ या टोल फ्री क्रमांकावर संपर्क साधण्याचे आवाहन केले आहे.
