अकोले (महाराष्ट्र संवाद न्यूज)
अकोले तालुका कृषी उत्पन्न बाजार समितीच्या सभापतीपदी राष्ट्रवादी काँग्रेसचे तालुका अध्यक्ष व महाविकास आघाडी प्रणित शेतकरी समृद्धी मंडळाचे संचालक भानुदास तिकांडे तर उपसभापतीपदी राष्ट्रवादीचेच रोहिदास भोर निवडून आले. विरोधी भाजप उमेदवारांचा या निवडणुकीत पराभव झाला.
बाजार समितीच्या सभापती, उपसभापती निवडीसाठी बुधवारी निवडणूक पार पडली. सभापतीपदासाठी मविआकडून राष्ट्रवादी काँग्रेसचे तालुका अध्यक्ष भानुदास तिकांडे व भाजप प्रणित शेतकरी विकास मंडळाकडून बाळासाहेब सावंत यांनी, उपसभापती पदासाठी मविआकडून राष्ट्रवादी काँग्रेसचेच माजी उपसभापती रोहिदास भोर व भाजपकडून शिवराम अरज यांनी अर्ज दाखल केले होते.
सभापती व उपसभापती पदासाठी प्रत्येकी दोन अर्ज आल्याने गुप्त मतदान पद्धतीने निवडणूक घेण्यात आली यात सभापतीपदासाठी भानुदास तिकांडे, उपसभापती पदासाठी रोहिदास भोर यांना 11 मते मिळाली. तर सभापती व उपसभापती पदासाठी पराभूत झालेले भाजपच्या बाळासाहेब सावंत व शिवनाथ आरज यांना प्रत्येकी 7 मते मिळाली असल्याचे निकालानंतर स्पष्ट झाले.
निवडणूक निर्णय अधिकारी शिरीष कुलकर्णी यांच्या अध्यक्षतेखाली झालेल्या बैठकीत या निवडी पार पडल्या. त्यांना सहाय्यक निवडणूक निर्णय अधिकारी म्हणून योगेश कापसे व अकोले बाजार समितीचे सचिव अरुण आभाळे यांनी सहकार्य केले.
घोडेबाजाराची शक्यता लक्षात घेत महाविकास आघाडीच्या नवनिर्वाचित संचालकांना कोकणच्या सहलीवर नेण्यात आले होते. पाच दिवसांच्या सहली नंतर हे सर्व संचालक आज बुधवारी सकाळी अकोल्यात परतले. त्यानंतर या संचालकांसमवेत आमदार डॉ. किरण लहामटे, अगस्ती कारखान्याचे अध्यक्ष सिताराम गायकर शिवसेना उद्धव ठाकरे गटाचे तालुकाप्रमुख मनोज मोरे उपजिल्हाप्रमुख महेश नवले यांची एकत्रित बैठक झाली या बैठकीत संचालकांनी सभापती, उपसभापतीपदाचा उमेदवार ठरविला.
