अहमदनगर (महाराष्ट्र संवाद न्यूज)
राज्याचे उपमुख्यमंत्री देवेंद्र फडणवीस गुरुवारी रात्री अहमदनगरमध्ये मुक्कामी येत आहे. पुण्याहून रात्री ते अहमदनगरला येणार असून त्यांच्या समवेत राज्याचे महसूल संवर्धन मंत्री राधाकृष्ण विखे पाटील देखील नगरमध्ये येत आहेत. फडणवीस उद्या नगर मधील विविध कार्यक्रमांना उपस्थित राहणार आहेत.
फडणवीस यांच्या उपस्थितीत नगरमध्ये शुक्रवारी भाजपचा मेळावा होत असून या मेळाव्यात ते मार्गदर्शन करणार आहे. याशिवाय त्यांच्या उपस्थितीत आणखी काही कार्यक्रमाचे आयोजन करण्यात आले आहे. फडणवीस गुरुवारी रात्री नगरमध्ये येत असून पक्षाच्या पदाधिकाऱ्यांना रात्रीच्या भेटीत ते नेमका काय कानमंत्र देतात याची कार्यकर्त्यांना उत्सुकता आहे.
शुक्रवारी सकाळी त्यांच्या हस्ते अहमदनगरच्या नूतन शासकीय विश्रामगृहाचे भूमिपूजन केले जाणार आहे. या कार्यक्रमा पाठोपाठ ते जिल्हाधिकारी कार्यालयात जिल्हा संदर्भात विकास आढावा बैठक घेणार आहेत.
केंद्रात मोदी सरकार सत्तेत येऊन नऊ वर्षांचा कालावधी उलटला आहे. या पार्श्वभूमीवर 30 मे ते 30 जून या कालावधीत जनसंपर्क अभियान राबविले जाणार असून या अभियानासंदर्भात पारिजात चौकातील कोहिनूर मंगल कार्यालयात आयोजित करण्यात आलेल्या मेळाव्यास ते उपस्थित राहून पदाधिकारी, कार्यकर्त्यांना मार्गदर्शन करणार आहेत.
मेळाव्यानंतर शिर्डी येथे होणाऱ्या हिंदू हृदय सम्राट बाळासाहेब ठाकरे समृद्धी महामार्गाच्या दुसऱ्या टप्प्याचे शिर्डी ते भरवीर या मार्गाचे लोकार्पण फडणवीस यांच्या उपस्थितीत केले जाणार आहे. यासाठी देखील ते उपस्थित राहणार असल्याची माहिती मिळते.
