अनंत पांगारकर | महाराष्ट्र संवाद न्यूज
संगमनेर-अकोलेच्या पोलीस उपअधीक्षक पदाचा पदभार भुसावळ येथून बदलून आलेल्या सोमनाथ वाकचौरे यांनी शनिवारी सायंकाळी स्वीकारला. संगमनेरचे प्रभारी डीवायएसपी संजय सातव यांच्याकडून त्यांनी आपल्या पदाची सूत्रे घेतली. दीर्घकाळ रिक्त असलेल्या या पदावर गृह विभागाने वाकचौरे यांची नियुक्ती केल्याने त्यांचा येथील कार्यकाळ कसा राहतो हे येत्या काही दिवसात स्पष्ट होईल.
संगमनेरचे तत्कालीन डीवायएसपी राहुल मदने यांची नागपूरला बदली झाल्यापासून संगमनेरचे पोलीस उपाधीक्षक पद रिक्त होते. या पदाचा अतिरिक्त पदभार शिर्डीचे पोलीस उपाधीक्षक संजय सातव यांच्याकडे सोपविण्यात आला होता. संगमनेरची नियुक्ती निश्चित झाल्यानंतर वाकचौरे यांनी शनिवारी सायंकाळी नवीन नगर रस्त्यावरील प्रशासकीय भावनातील आपल्या कार्यालयात प्रभारी डीवायएसपी संजय सातव यांच्याकडून त्यांनी पदभार घेतला.
वाकचौरे यांनी यापूर्वी काही काळ श्रीरामपूर विभागामध्ये काम केलेले आहे. त्यामुळे त्यांना संगमनेर तालुका बऱ्यापैकी माहिती आहे. संगमनेरच्या पोलीस उपाधीक्षक पदाचा पदभार घेतेवेळी संगमनेर शहर पोलीस ठाण्याचे पोलीस निरीक्षक भगवान मथुरे, तालुका पोलीस ठाण्याचे पोलीस निरीक्षक देविदास ढुमणे उपस्थित होते.
वाकचौरे संगमनेरसाठी नवे असले तरीदेखील श्रीरामपूर उपविभागात त्यांनी काम केल्याचा पूर्वानुभव आहे. संगमनेर अकोले तालुक्याअंतर्गत येणाऱ्या सहाही पोलीस ठाण्यात नवे पोलीस अधिकारी यापूर्वीच नियुक्त झालेले असल्याने वाकचौरे यांना नवी टीम मिळाली आहे. या नव्या टीममध्ये काही अनुभवी अधिकारी आहेत. याशिवाय पोलीस दलात नुकत्याच मोठ्या प्रमाणात अंतर्गत बदल्या झाल्याने पोलीस अधीक्षक राकेश ओला यांनी या पोलीस ठाण्यांमध्ये नव्यानेच दुसऱ्या कर्मचाऱ्यांच्या नियुक्त्या केल्या आहे. त्यामुळे आता या नव्या टीमसोबत गुन्हेगारीचा बिमोड करण्याचे आव्हान त्यांच्यासमोर असेल.
विस्ताराने मोठ्या असलेल्या संगमनेर-अकोले तालुक्याच्या कार्यक्षेत्रात वाकचौरे यांच्या अंतर्गत सहा पोलीस ठाण्यांचा समावेश आहे. यामध्ये संगमनेरमधील संगमनेर शहर, संगमनेर तालुका, घारगाव, आश्वी आणि अकोले तालुक्यातील अकोले व राजुर पोलीस ठाण्यांचा समावेश आहे. संगमनेर अकोल्यातील प्रलंबित गुन्ह्यांसोबतच नव्याने घडणाऱ्या गुन्ह्यांच्या तपासाच्या दृष्टीने वाकचौरे यांना लक्ष घालावे लागणार आहे. याशिवाय पोलीस खात्याला लाभाचे ठरणारे आणि अडचणीत आणणारे अवैध धंदे देखील वाकचौरे कशा पद्धतीने हाताळतात हेही येत्या काही दिवसात स्पष्ट होईल.
