महाराष्ट्र संवाद न्यूज
चंद्रपूर : चंद्रपूरचे काँग्रेस खासदार सुरेश तथा बाळू धानोरकर (वय 47 वर्ष) यांचे नवी दिल्ली येथील मेदांता रुग्णालयात उपचार सुरू असताना निधन झाले. धानोरकर राज्यातील काँग्रेसचे एकमेव खासदार होते. चारच दिवसांपूर्वी त्यांचे वडील नारायण धानोरकर यांचे निधन झाले होते. वडिलांपाठोपाठ चार दिवसांनी मुलाचे निधन झाल्याने हळहळ व्यक्त होत आहे. पिता पुत्राच्या लागोपाठ झालेल्या निधनामुळे कुटुंबीयांवर दुःखाचा डोंगर कोसळला आहे.
धानोरकर यांच्या पश्चात पत्नी आमदार प्रतिभा धानोरकर आणि दोन मुले असा परिवार आहे. प्रकृती अस्वस्थामुळे भद्रावती येथे झालेल्या वडिलांच्या अंतिम संस्काराला बाळू धानोरकर उपस्थित राहू शकले नाही. त्यामुळे वडिलांचे अंतिम विधी धानोरकर यांचे भाऊ अनिल यांनी केले होते. शनिवारी (27 मे) नागपूरच्या खाजगी रुग्णालयात खासदार धानोरकर यांच्यावर किडनी स्टोनचे शस्त्रक्रिया करण्यात आली त्यानंतर आतड्यात झालेल्या इन्फेक्शनमुळे त्यांची प्रकृती अचानक बिघडल्याने त्यांना दुसऱ्या दिवशी रविवारी (28 मे) पुढील उपचारासाठी नागपूरहून विशेष एअर ॲम्बुलन्सने दिल्लीला हलविण्यात आले होते.
दिल्लीच्या मेदांता रुग्णालयात त्यांच्यावर उपचार सुरू होते त्यांच्या प्रकृतीत काही अंशी सुधारणा झाल्याचे सोमवारी समोर आले होते. मात्र, मंगळवारी पहाटे उपचारादरम्यान त्यांचे निधन झाले. धानोरकर यांचे पार्थिव एअर ॲम्बुलन्सने महाराष्ट्रात आणल्यानंतर उद्या वरोरा येथे त्यांच्यावर अंतिम संस्कार होणार आहेत.
कोण होते धानोरकर…
बाळू धानोरकर हे शिवसेनेचे चंद्रपूर जिल्हा प्रमुख होते. 2019 च्या लोकसभा निवडणुकीत त्यांनी काँग्रेसकडून उमेदवारी मिळविली. काँग्रेसच्या तिकिटावर ते निवडणूक लढले आणि जिंकलेही. राज्यातील ते काँग्रेसचे एकमेव खासदार होते.
