महाराष्ट्र संवाद न्यूज
संगमनेर – आपल्या ग्रामीण भागातील जिल्हा परिषद प्राथमिक शाळा, विद्यालये यांची गुणवत्ता चांगली असल्याने आज याच शाळांमधून केंद्रीय लोकसेवा आयोग स्पर्धा परिक्षेचे विद्यार्थी उत्तीर्ण होत आहेत, ही अभिमानाची बाब असल्याचे प्रतिपादन माजी महसूलमंत्री आमदार बाळासाहेब थोरात यांनी केले.
संगमनेर तालुक्यातील सुकेवाडी येथील मंगेश पाराजी खिलारी यांनी केंद्रीय लोकसेवा आयोगाच्या परीक्षेत देशात ३९६ व्या रँकने उत्तीर्ण होत यश मिळविले. याबद्दल आमदार थोरात यांच्या हस्ते तालुक्यातील सुकेवाडी येथे त्यांचा भव्य नागरी सत्कार करण्यात आला. यावेळी माजी आमदार डॉ. सुधीर तांबे, माजी नगराध्यक्ष दुर्गाताई तांबे, ज्येष्ठ नेते लक्ष्मणराव कुटे, माजी नगरसेवक व उद्योजक गोरख कुटे, सरपंच योगिता सातपुते, उपसरपंच सुभाषराव कुटे, भागवत बाबा पतसंस्थचे अध्यक्ष सोपानराव कुटे, विविध कार्यकारी सेवा सोसायटीचे अध्यक्ष गोरख सातपुते, दुधगंगा पतसंस्थेचे अध्यक्ष भाऊसाहेब कुटे, माजी पंचायत समिती सदस्य अशोक सातपुते, माजी शिवसेना तालुकाप्रमुख जनार्दन आहेर, शिवाजी खूळे, दादासाहेब कुटे, भारत सातपुते, निखील पापडेजा, गौरव डोंगरे आदी उपस्थित होते.
सुकेवाडी परिसराचे ज्येष्ठ नेते लक्ष्मणराव कुटे व वसंत लॉन्सचे संचालक गोरखशेठ कुटे पाटील यांनी चि.मंगेश यांचा कौटूंबिक सत्कार केला.
डॉ. तांबे यांनी मंगेशचे वडील चहा ठेला चालवतात तर आई विडी कामगार असतांना त्याने अतिशय मेहनतीने यश मिळविल्याबद्दल कौतुक केले. माजी नगराध्यक्षा दुर्गाताई तांबे यांनी आपल्या ग्रामीण भागातील जिल्हा परिषद प्राथमिक शाळा व विद्यालय यांना भविष्यात उत्तम भौतिक सुविधांसाठी एकजूट होऊन काम करायला हवे अशी अपेक्षा व्यक्त केली.
प्रास्ताविक तंटामुक्ती समितीचे उपाध्यक्ष विलास कुटे यांनी, सुत्रसंचालन सायखिंडी विद्यालयाचे मुख्याध्यापक संदीप सातपुते यांनी तर उपस्थितांचे आभार छावाचे कार्याध्यक्ष खंडू सातपुते यांनी मानले. यावेळी सुकेवाडी-खांजापूर परीसरातील नागरिक मोठ्या संख्येने उपस्थित होते.
