महाराष्ट्र संवाद न्यूज
संगमनेर – शहरातील जोर्वे नाका येथे जोर्वे येथील आठ तरुणांवर झालेला प्राणघातक हल्ला, त्यानंतर त्याचे जोर्वे गावात उमटलेले पडसाद, शहरातील भगवा मोर्चा नंतर समनापुर गावात पोलीस निरीक्षक देविदास ढुमणे यांच्यासमोर झालेली दगडफेक प्रकरण हाताळण्यात अपयशी ठरलेल्या पोलीस निरीक्षक ढुमणे यांची नगर कंट्रोलला तडकाफडकी महिनाभराच्या आतच बदली करण्यात आली आहे.
त्यांचा पदभार प्रशिक्षणार्थी पोलीस उपाधीक्षक शिरीष वमने यांच्याकडे तीन महिन्यांसाठी सोपविण्यात आला आहे. मंगळवारी रात्री वमने यांनी तालुका पोलीस ठाण्याची सूत्रे हाती घेतली.
जोर्वे येथील तरुणांवर झालेल्या प्राणघातक हल्ल्यानंतर संगमनेरमध्ये कायदा सुव्यवस्थेचा गंभीर प्रश्न निर्माण झाला होता. शहर पोलीस ठाण्याच्या हद्दीत घडलेल्या या प्रकारावर नियंत्रण मिळविण्यात शहर पोलीस ठाण्याचे निरीक्षक भगवान मथुरे यशस्वी ठरले. नव्यानेच पदभार घेऊन काही तास उलटत नाही तोच उपाधीक्षक सोमनाथ वाघचौरे यांना देखील याप्रकरणी मोठी कसरत करावी लागली.अप्पर पोलीस अधीक्षक स्वाती भोर, पोलीस अधीक्षक राकेश ओला यांना देखील संगमनेरमध्ये ठाण मांडावे लागले होते. परिस्थिती नियंत्रणात आले असली तरी त्याचे दूरगामी परिणाम पुढच्या आठवडाभरात दिसून आले.
जोर्वे नाका येथील घटनेनंतर दुसऱ्या दिवशी त्याचे पडसाद जोर्वे गावात उमटले होते. यामुळे तालुक्यात असंतोष निर्माण होत होता. त्यानंतर या सर्व प्रकरणाची परिणती शहरातून भगवा मोर्चा काढण्यात झाली होती. हा मोर्चा संपल्यानंतर तालुक्याच्या पूर्व भागात परतणाऱ्या काही समाजकंटकांनी समनापुरमध्ये दगडफेक करत दुचाकी, चारचाकी वाहनांचे नुकसान केले होते तसेच घरात घुसून मारहाणीचा देखील प्रयत्न झाला. या प्रकारात तीन जण जखमी झाले होते. विशेष म्हणजे दगडफेकीची ही घटना संगमनेर तालुका पोलीस ठाण्याचे पोलीस निरीक्षक देविदास ढुमणे यांच्यासमोर घडली होती. याचे व्हिडिओ देखील मोठ्या प्रमाणात व्हायरल झाले होते.
या प्रकारातूनच ढुमणे यांची पोलीस अधीक्षकांनी नगर मुख्यालयात रवानगी केल्याचे बोलले जात आहे. संगमनेर तालुका पोलीस ठाण्यात उपाधीक्षक वमने यांचा कार्यकाल संपल्यानंतर पोलीस अधीक्षक तालुका पोलीस ठाण्याच्या निरीक्षकपदी कोणाची नियुक्ती करतात याकडे लक्ष लागले आहे.
