महाराष्ट्र संवाद न्यूज
संगमनेर – पुरोगामी विचारांचे पाईक व शिक्षण क्षेत्रात महत्त्वपूर्ण योगदान देणारे टीडीएफ या राज्य संघटनेचे सचिव हिरालाल पगडाल यांच्या चिन्नण्णा’ या पुस्तकाचा रविवारी (9 जुलै) 4 वाजता सह्याद्री महाविद्यालयांच्या के. बी. दादा सभागृहात प्रकाशन सोहळा आयोजित केल्याची माहिती नगराध्यक्ष दुर्गाताई तांबे यांनी दिली.
हिरालाल पगडाल हे फुले, शाहू, आंबेडकर विचारसरणीचे विचारवंत व लेखक असून त्यांचे यापूर्वीही ‘इलेक्शन बिलेक्शन’ हे पुस्तक प्रकाशित झाले आहे. चिन्नण्णा पुस्तकाचे प्रकाशन यशवंतराव चव्हाण महाराष्ट्र मुक्त विद्यापीठाचे कुलगुरू डॉ. संजीव सोनवणे यांच्या हस्ते होणार असून काँग्रेस विधिमंडळ पक्षनेते आमदार बाळासाहेब थोरात, महाराष्ट्र साहित्य परिषदेचे अध्यक्ष डॉ. रावसाहेब कसबे हे प्रमुख पाहुणे म्हणून उपस्थित राहणार आहे. तर माजी आमदार डॉ. सुधीर तांबे कार्यक्रमाच्या अध्यक्षस्थानी असतील.
यावेळी शिक्षण प्रसारक संस्थेचे कार्याध्यक्ष डॉ. संजय मालपाणी, नगराध्यक्ष दुर्गाताई तांबे, राज्य महिला आयोगाच्या सदस्य उत्कर्षा रूपवते, चपराक प्रकाशनचे प्रकाशक व लेखक घनश्याम पाटील, साहित्यिक डॉ. संतोष खेडलेकर, शिक्षण क्षेत्रातील तज्ञ साहित्यिक संदीप वाकचौरे आदींसह साहित्य क्षेत्रातील विविध मान्यवर उपस्थित राहणार आहेत.
पुस्तक प्रकाशन सोहळ्यासाठी संगमनेरमधील साहित्य प्रेमी, नागरिक, महिला व युवकांनी उपस्थित राहावे असे आवाहन जयहिंद लोक चळवळ, चपराक प्रकाशन व पुस्तक प्रकाशन सोहळा समितीच्यावतीने करण्यात आले आहे.
