महाराष्ट्र संवाद न्यूज @ अनंत पांगारकर
संगमनेर – चारित्र्याच्या संशयावरून रागाच्या भरात पत्नीस लोखंडी पहारीने मारहाण करीत तिचा खून करणाऱ्या आणि तिला सोडविण्यासाठी मध्ये आलेल्या व्यक्तीला मारहाण करीत जीवे मारण्याचा प्रयत्न करणाऱ्या आरोपीला संगमनेरच्या जिल्हा व अतिरिक्त सत्र न्यायालयाने सात वर्षे सश्रम कारावास आणि पाच हजार रुपये दंडाची शिक्षा ठोठावली आहे.
या आरोपीला झाली शिक्षा: बाळासाहेब तुळशीराम फटांगरे (रा. लक्ष्मी नगर, संगमनेर) असे शिक्षा झालेल्या आरोपीचे नाव आहे. आरोपी विरोधात पोलिसांनी खून आणि सदोष मनुष्यवधाचा गुन्हा दाखल केला होता. न्यायालयाने आरोपीला सदोष मनुष्य वधाच्या तसेच घातक हत्याराने दुखापत करण्याच्या आरोपात दोषी ठरविले आहे. संगमनेरचे जिल्हा व अतिरिक्त सत्र न्यायाधीश पी. पी. कुलकर्णी यांच्यासमोर या खटल्याची सुनावणी सुरू होती.
काय होती घटना: १३ ऑक्टोंबर २०१६ रोजी आरोपी बाळासाहेब तुळशीराम फटांगरे याने चारित्र्याच्या संशयावरून आपल्या राहत्या घरी पत्नी वैशाली उर्फ छाया बाळासाहेब फटांगरे (वय ३५ वर्ष) हिला घरातील लोखंडी पहारीने मारहाण केली. मारहाण होते वेळी भानुदास लालू गुंजाळ हे दोघांचे भांडण मिटविण्यासाठी गेले असता याचा राग आल्याने आरोपीने त्यांना देखील लोखंडी पहारीने मारहाण करत जीवे ठार मारण्याचा प्रयत्न केला.
यांनी केला तपास: पती बाळासाहेब फटांगरे यांनी केलेल्या मारहाणीत पत्नीचा वैशाली उर्फ छाया हिचा मृत्यू झाला होता. तर भानुदास गुंजाळ यांना डोक्यात पहार मारल्याने ते जखमी झाले होते. यासंदर्भात संगमनेर शहर पोलीस ठाण्यात बाळासाहेब फटांगरे याच्या विरोधात सदोष मनुष्यवध आणि खूनाचा गुन्हा दाखल करण्यात आला होता. तत्कालीन सहाय्यक फौजदार विजय सरवदे आणि पोलीस उपनिरीक्षक अन्सार इनामदार यांनी याप्रकरणी तपास केला होता. आरोपी विरोधात शहर पोलिसांनी जिल्हा अतिरिक्त सत्र न्यायालयात आरोपपत्र दाखल केले होते.
या न्यायालयासमोर झाली सुनावणी: या खटल्याची सुनावणी जिल्हा अतिरिक्त सत्र न्यायाधीश पी. पी. कुलकर्णी यांच्यासमोर सुरू होती. सरकार पक्षाच्या वतीने अतिरिक्त सरकारी वकील जयंत दिवटे यांनी काम बघितले. त्यांना पैरवी अधिकारी पोलीस हेडकॉन्स्टेबल प्रवीण डावरे, महिला पोलीस कॉन्स्टेबल स्वाती नाईकवाडी, दिपाली दवंगे, नयना पंडित व प्रतिभा थोरात यांनी सहकार्य केले.
एवढ्या साक्षीदारांची तपासणी: न्यायालयात सरकार पक्षाच्यावतीने पंधरा साक्षीदार तपासण्यात आले. यात फिर्यादीसह मारहानीत जखमी झालेल्या भानुदास गुंजाळ, प्रत्यक्ष साक्षीदार, वैद्यकीय अधिकारी, तपास अधिकाऱ्यांच्या साक्षी महत्त्वपूर्ण ठरल्या.
दोषी ठरवत ठोठावली शिक्षा: सरकार पक्ष आणि आरोपीच्या वकिलांचा युक्तिवाद ऐकल्यानंतर न्यायालयाने आरोपी बाळासाहेब फटांगरे याला दोषी ठरवत भारतीय दंड विधान १८६० चे कलम ३०४ अन्वये दोषी ठरवत सात वर्षं सश्रम कारावास, पाच हजार रुपये दंड आणि दंड न भरल्यास दीड महिना साध्या कारावासाची तसेच भारतीय दंड विधान १८६० चे कलम ३२६ अन्वये दोषी ठरवत सात वर्षं सश्रम कारावास, पाच हजार रुपये दंड आणि दंड न भरल्यास दीड महिना साध्या कारावासाची शिक्षा ठोठावली आहे. संगमनेर शहरालगत घडलेल्या या घटनेमुळे शहरात खळबळ उडाली होती.
