महाराष्ट्र संवाद न्यूज ऑनलाईन- दूध भेसळ प्रकरणातील मुख्य आरोपी असलेल्या आफताब कलीम शेख याला अखेर न्यायालयाने नियमित जामीन मंजूर केला आहे. घटनेच्या दिवसापासून तुरुंगात असलेल्या शेख याला तब्बल २४९ दिवसांनी श्रीगोंदा येथील जिल्हा व सत्र न्यायालयाने जामीन मंजूर झाला आहे.
स्थानिक गुन्हे शाखा व अन्न व औषध प्रशासनाने १४ फेब्रुवारीला जामखेडमध्ये छापा टाकला होता. या छाप्याच्या कारवाईत तिघा जणांना अटक करण्यात आली होती. अटक केलेल्या आरोपीसोबत त्या ठिकाणी नकली दूध बनवण्याच्या साहित्यापासून बनवलेले ४ ड्रम रसायन जप्त करण्यात आले होते.
सदरचे रसायन बनवण्यासाठी लागणारे पॅराफिन ऑइल, पावडर, इमल्सीफायर यांचा मोठ्या प्रमाणावर साठा त्या ठिकाणी जप्त करण्यात आला होता. सदरचे सर्व रसायने ही विषारी व मानवी आरोग्यास हानिकारक मानले जातात. त्या ठिकाणी १७ लाख रुपयांचा मुद्देमाल जप्त करण्यात आला होता.
पकडलेल्या ३ आरोपींमध्ये मुख्य आरोपी हे राहुरी येथील होते. त्यानंतर यामध्ये आर्थिक देवाणघेवाण तसेच फोन रॅकॉर्ड वरून या प्रकरणात ५० पेक्षा जास्त आरोपींचा समावेश करण्यात आला होता. त्यापैकी जवळपास सर्व आरोपींना श्रीगोंद्याच्या जिल्हा व सत्र न्यायालयाने जामीन दिला होता. यात दूध भेसळ रॅकेट चालवण्याचा आरोप असलेला मुख्य आरोपी आफताब कलीम शेख हा घटनेच्या दिवसापासून अटकेत होता. त्याच्यावर पूर्वी याच प्रकारचे तीन गुन्हे नाशिक जिल्ह्यात दाखल होते. मुद्देमाल हस्तगत झाल्याने तसेच रंगेहात जागेवर पकडल्याने सदर आरोपीला जामीन मंजूर होत नव्हता.
राहुरी येथील ज्येष्ठ विधिज्ञ ॲड. सूरज एस. बिहाणी यांनी या प्रकरणात लक्ष घालून सदर प्रकरण दूध भेसळ प्रकरणातील अनुभवी वकील ॲड. वैभव सुरेश डोंगरे यांच्याकडे हे प्रकरण सोपवले. ॲड. डोंगरे यांनी दूध भैसळ प्रकरणात १० पेक्षा अधिक आरोपींचे कामकाज यापूर्वी पाहिलेले असल्याने वकिलपत्र प्राप्त झाल्यानंतर केवळ दहा दिवसांत सदर आरोपी हा जामीनावर मुक्त झाला आहे. या प्रकरणी ज्येष्ठ विधिज्ञ ॲड. बी. आर. आघाव यांनी मार्गदर्शन केले.