पोलिसांच्या नावाने टीका होत असताना बस स्थानकावरील सुरक्षारक्षक नेमके करतात काय?
एसटी प्रशासनच चोरीच्या घटनांना कारणीभूत…
महाराष्ट्र संवाद न्यूज
संगमनेर – राज्यातील सर्वात मोठ्या आणि एअरपोर्टचा लूक असलेले संगमनेरचे बसस्थानक दागिने आणि रोकड चोरांसाठी सॉफ्ट टारगेट ठरले आहे. बस स्थानकावरील सातत्याने घडणाऱ्या दागिने, रोकड चोरीच्या घटनांमुळे बस स्थानक प्रशासन आणि येथील सुरक्षारक्षक नेमके करतात काय? असा प्रश्न निर्माण झाला आहे. त्यामुळे चोरीच्या या घटनांना एसटी प्रशासनच कारणीभूत असल्याचे बोलले जाते.
सर्वाधिक घटना बस स्थानकात: दागिने चोरीच्या आत्तापर्यंतच्या सर्वाधिक घटना बस स्थानकामध्ये घडल्या आहेत. रविवारीदेखील (17 सप्टेंबर) बस स्थानकामध्ये दागिने आणि रोकड चोरीच्या दोन घटना घडल्या. विशेष म्हणजे एकाचवेळी सायंकाळी चारच्या सुमारास नाशिकला जाणाऱ्या बसमध्ये चढत असताना महिलेच्या पर्समधील दागिन्यांचा डबा तर एका व्यापाऱ्याच्या खिशातील सहा हजार रुपयांची रोकड चोरट्यांनी चोरून नेली. विशेष म्हणजे काळजी घेऊन देखील चोरीच्या या घटना घडत आहेत. यासंदर्भात संगमनेर पोलीस ठाण्यात दोन स्वतंत्र गुन्हे दाखल करण्यात आले आहे.
दागिने लांबविले: दिपाली सचिन पाटील (रा. अमृतधाम, पंचवटी, नाशिक) ही महिला शनिवारी नाशिक येथून अकोले तालुक्यातील गिरगाव येथे आपल्या माहेरी आली होती. रविवारी (17 सप्टेंबर) सायंकाळी चार वाजण्याच्या सुमारास ही महिला संगमनेर बस स्थानकातून नाशिककडे जाणाऱ्या बसमध्ये चढत असताना बस भोवती असलेल्या गर्दीचा फायदा घेत कोणीतरी या महिलेला धक्का दिला. त्यामुळे ही महिला बस मध्ये न चढता पुन्हा खाली उतरली.
दागिन्यांची डबी गायब: आपल्या जवळील पर्सची चैन उघडी असल्याचे खाली उतरलेल्या महिलेच्या लक्षात आल्याने तिने पर्स उघडली असता पर्समध्ये ठेवलेली दागिन्यांची डबी गायब झाल्याचे तिच्या लक्षात आले. चोरीच्या भीतीने या महिलेने आपल्या गळ्यातील दोन तोळ्याचे मंगळसूत्र आणि तीन तोळ्याची अंगठी एका डबीमध्ये ठेवत ती डबी स्वतः जवळील पर्समध्ये ठेवली होती. मात्र अज्ञात चोरट्यांनी तिच्या पर्समधील डबीच लांबविली असल्याचे दिसून आले. पाटील यांच्या फिर्यादीवरून शहर पोलिसांनी अज्ञात चोरट्याविरोधात गुन्हा नोंदविला आहे.
व्यापाऱ्याचा खिसा कापला: दुसऱ्या घटनेत याचवेळी नाशिककडे जाणाऱ्या बसमध्ये चढत असताना व्यापाऱ्याचा खिसा कापण्यात आला. मारळगाव (कल्याण) येथील व्यापारी रामचंद्र रहेदोमल रोरा हे व्यापारानिमित्त संगमनेरला आले होते. ते नाशिकला जाण्यासाठी नाशिकच्या बसमध्ये चढत असताना गर्दीत कोणीतरी त्यांच्या खिशात हात घातल्याचे त्यांना जाणवले. त्यामुळे त्यांनी बसमध्ये न चढता खाली उतरून घेत खिशातील पैसे तपासले असता खिशातून सहा हजार रुपयांची रोकड लंपास झाल्याचे त्यांचे निदर्शनास आले. याप्रकरणी देखील संगमनेर शहर पोलीस ठाण्यात अज्ञात चोरट्याविरोधात गुन्हा दाखल करण्यात आला आहे.
