महाराष्ट्र संवाद न्यूज
नाशिक – व्यवसाय कर रद्द करून देण्याच्या मोबदल्यात चार हजार रुपयांचे लाच घेताना नाशिकमध्ये महिला अधिकाऱ्याला लाच लुचपत प्रतिबंधक विभागाने पकडले आहे. स्नेहल सुनील ठाकूर असे या महिला व्यवसाय कर अधिकाऱ्याचे नाव आहे.
लाचेचे कारण: दोन वर्षांपासून बंद असलेल्या कल्पदीप इंडस्ट्रियल सिक्युरिटी सर्विसेस या कंपनीचा व्यवसाय कर रद्द व्हावा, यासाठी तक्रारदाराने 13 सप्टेंबरला व्यवसाय कर अधिकारी यांच्या कार्यालयात अर्ज केला होता. हा व्यवसाय कर रद्द करून द्यायच्या मोबदल्यात व्यवसाय कर अधिकारी स्नेहल ठाकूर (वय 52, रा. ग्रँड अश्विन हॉटेल जवळ, ASM 26/26 अश्विन संकुल रो हाऊस नंबर 4, अश्विन नगर, नाशिक) यांनी तक्रारदाराकडे पाच हजार रुपयांची मागणी केली होती.
तक्रार: या संदर्भात तक्रारदाराने नाशिकच्या लाच लुचपत विभागाशी संपर्क करत तक्रार केली होती. तडजोडीअंती तक्रारदाराकडून पाच हजार रुपयांऐवजी 4 हजार रुपयांची लाच स्वीकारताना ठाकूर यांना पंचा समक्ष पकडण्यात आले आहे.
यांनी केली कारवाई: पोलीस अधीक्षक शर्मिष्ठा वालावलकर, अपर पोलीस अधीक्षक माधव रेड्डी, उपअधीक्षक नरेंद्र पवार यांच्या मार्गदर्शनाखाली सापळा अधिकारी पोलीस उपाधीक्षक विश्वजीत जाधव यांच्यासह पोलीस हवालदार प्रकाश डोंगरे, पोलीस नाईक प्रणय इंगळे, महिला पोलीस शिपाई शितल सूर्यवंशी, चालक पोलीस हवालदार संतोष गांगुर्डे यांच्या पथकाने ही कारवाई केली.
