पकडलेल्या आरोपीकडून दोन खुनाचा उलगडा; पीडित मुलीसोबत पैशासाठी आईचीही हत्या केल्याचे निष्पन्न
महाराष्ट्र संवाद न्यूज @ अनंत पांगारकर
संगमनेरमधील जुन्या आणि निर्जन असलेल्या चंदनापुरीच्या घाटात 24 सप्टेंबरला एका अल्पवयीन मुलीचा विद्रूप अवस्थेतील मृतदेह आढळून आला होता. प्राथमिकदृष्ट्या घातपात असल्याचे स्पष्ट करणाऱ्या या घटनेत पोलिसांसमोर या मृतदेहाची ओळख पटविण्याचे आव्हान असताना अवघ्या काही तासात पोलिसांनी केवळ मृत मुलीची ओळखच पटविली नाही तर आरोपीदेखील गजाआड केला. यातील कौतुकास्पद बाब म्हणजे आरोपीने एक नव्हे तर दोन खून केल्याची उकल करण्यात पोलीस यशस्वी झाल्याची माहिती संगमनेरचे उपविभागीय पोलीस अधिकारी सोमनाथ वाघचौरे यांनी दिली.
दारू पाजून अल्पवयीन मुलीची हत्या: अल्पवयीन पीडित मुलीची डोक्यात दगड टाकून हत्या करण्यात आल्याने या मुलीचा चेहरा विद्रूप झाला होता. त्यामुळे तिची ओळख पटवण्याचे आव्हान पोलिसांसमोर होते. मात्र पोलीस यंत्रणेने मेहनतीने तपास करत या मुलीची ओळख पटविली. यासाठी पोलिसांनी तीन पथकांची नियुक्ती केली होती. संगमनेर शहरातील ज्ञानमाता विद्यालयासमोर राहणाऱ्या निर्मला राजेंद्र कदम या मुलीचा हा मृतदेह असल्याचे स्पष्ट झाले.
चौघे ताब्यात घेतले मारेकरी निघाला वेगळाच: या खून प्रकरणाची उकल करताना पोलिसांनी चार संशयीतांना ताब्यात घेतले होते. त्यांच्याकडे कसून चौकशी सुरू असतानाच पोलीस तपासाची दिशा अन्य एका आरोपीकडे गेली. ही पीडित मुलगी एका संस्थेचा बरोबर दुचाकीवरून गेल्याचे सीसीटीव्ही द्वारे निष्पन्न झाल्याने पोलिसांनी तुषार विठ्ठल वाळुंज (वय 25 वर्ष, रा. लक्ष्मीनगर, गुंजाळवाडी, संगमनेर) याला ताब्यात घेतले. त्याच्याकडे कसून चौकशी केली असता त्याने पीडित मुलीला दारू जुन्या चंदनापुरी घाटात नेत तिची हत्या केल्याचे कबूल केले.
आरोपीने आईचीही केली हत्या: आरोपीकडे पोलिसांनी आणखी कसून चौकशी केली असता त्याने नऊ महिन्यांपूर्वी स्वतःच्या आईची पैशासाठी हत्या केल्याची कबुली दिली आहे. त्यामुळे या दुसऱ्या प्रकरणाचे फाईल आता उघडली गेली. सखुबाई विठ्ठल वाळुंज यांनी नऊ महिन्यांपूर्वी जानेवारीमध्ये गळफास घेऊन आत्महत्या केल्याचे प्रकरण समोर आले होते. मात्र आता आरोपीने दिलेल्या कबुलीनंतर या प्रकरणाला पुन्हा वेगळं वळण मिळाले आहे.
गळफास घेतल्याचे भासविले: आरोपी वाळूजला दारू पिण्याचे व्यसन असून त्याच्या वडिलांचा मृत्यू झालेला आहे. तर आई रोजनदारी करून कुटुंबाचा उदरनिर्वाह करत होती. आरोपीने आपल्या व्यसनासाठी आईकडे जानेवारीमध्ये पैशाची मागणी केली होती. आईने त्याला पैसे देण्यास नकार दिल्याने त्याने आईची गळफास देऊन हत्या केली. आणि तिने गळफास घेतल्याचे भासविले होते, अशी माहिती तपासात पुढे आली आहे.
यांनी केला तपास: संगमनेर तालुका पोलीस ठाण्याचे पोलीस निरीक्षक देविदास ढुमणे, पोलीस उपनिरीक्षक सालोमान सातपुते, स्थानिक गुन्हे शाखेचे पोलीस उपनिरीक्षक गोरे, पोलीस उपाधीक्षकांच्या पथकातील पोलीस कर्मचारी राहुल डोके, राहुल सारबंदे, शहर पोलीस ठाण्यातील गवळी, शिरसाठ, कुऱ्हे आदींच्या पथकाने ही कामगिरी केली.
