महाराष्ट्र संवाद न्यूज
संगमनेर – भूखंड व्यवहारापोटी अनामत म्हणून आरोपीला तक्रारदाराने पाच लाख रुपये दिले. मात्र नंतर सदर भूखंडाचा व्यवहार न झाल्याने आरोपीने तक्रारदाराला त्या व्यवहारापोटी दिलेला धनादेश वटला नाही म्हणून संगमनेरच्या अतिरिक्त मुख्य न्याय दंडाधिकाऱ्यांनी आरोपीला दोषी ठरवत एक वर्ष कारावासाची शिक्षा आणि पाच लाख रुपयांच्या दंड ठोठावला आहे.
प्रकाश प्रभू अरगडे (रा. सुकेवाडी, ता. संगमनेर) असे शिक्षा झालेल्या आरोपीचे नाव आहे. प्रशांत चंद्रकांत डहाळे यांनी यासंदर्भात संगमनेरच्या न्यायालयात खटला दाखल केला होता. या खटल्याची सुनावणी अतिरिक्त मुख्य न्यायदंडाधिकारी डी. एम. गिरी यांच्यासमोर झाली. डहाळे यांच्यावतीने ॲड. सैफुद्दीन शेख यांनी ॲड. संजय दीक्षित यांच्या मार्गदर्शनाखाली काम बघितले.
मजुरीचे काम करणाऱ्या प्रशांत डहाळे यांना प्लॉट खरेदी करून त्यावर बांधकाम करावयाचे होते. ही बाब ओळखीतून त्यांनी आरोपी प्रकाश प्रभू अरगडे याला सांगितले. अरगडे याने त्याच्या घरासमोर असलेल्या मीरा हॉटेलजवळ सुकेवाडी (ता. संगमनेर) येथे प्लॉट विक्रीसाठी उपलब्ध असल्याचे डहाळे यांना सांगितले होते. तसेच या संदर्भातील व्यवहार करून देण्याचे अरगडे याने कबूल केले होते.
अरगडे याने दाखविलेला प्लॉट डहाळे यांना पसंत पडल्याने त्यांनी यासंदर्भात अरगडे याला मूळ मालकाशी व्यवहाराची बोलणी करण्यास सांगितले. डिसेंबर 2020 मध्ये डहाळे यांना प्लॉटच्या व्यवहारापोटी अॅडव्हान्स म्हणून पाच लाख रुपयाची व्यवस्था करण्यास सांगितले. त्यामुळे डहाळे यांनी अरगडे यास डिसेंबर महिन्याच्या शेवटच्या आठवड्यात पाच लाख रुपये दिले. तसेच उर्वरित रकमेची व्यवस्था करण्यास डहाळे यांना सांगितले. डहाळे यांचा अरगडे याच्यावर विश्वास असल्याने त्यांनी या संदर्भात कोणताही करारनामा केला नाही.
उर्वरित रकमेची व्यवस्था झाल्यानंतर व्यवहार निश्चित करू असे अरगडे याने डहाळे यांना सांगितले. त्यानंतर डहाळे यांनी अरगडे यांना वेळोवेळी व्यवहाराबद्दल विचारणा केल्या असता अरगडे यांनी प्लॉट विक्रीसाठी उपलब्ध नसल्याचे सांगितले. त्यामुळे डहाळे यांनी अनामत म्हणून दिलेल्या पाच लाख रुपयांची मागणी केली असता अरगडे याने पाच लाख रुपयांचा धनादेश डहाळे यांना दिला होता.
डहाळे यांनी हा धनादेश बँकेत भरल्यानंतर तो खात्यावर निधी अपुरा असल्याने परत आला. त्यामुळे डहाळे यांनी अरगडे यांना नोटीस पाठवून रकमेची मागणी केली. मात्र रक्कम न मिळाल्याने डहाळे यांनी अरगडे यांच्या विरोधात न्यायालयात निगोशिएबल इन्स्ट्रुमेंटस अॅक्ट कलम १३८ प्रमाणे फिर्याद दाखल केली होती. न्यायाधीश डी. एम. गिरी यांच्यासमोर या खटल्याची सुनावणी झाली.
न्यायालयाने आरोपी प्रकाश प्रभू अरगडे याला दोषी ठरवत एक वर्षाचा साधा कारावास आणि 5,00,000/- (रु. पाच लाख रुपये) ची भरपाई देण्याचा हुकूम केला. या निर्णया विरोधात आरोपीने जिल्हा व सत्र न्यायालयात अपील केल्याची माहिती मिळते.
