कॅशियर उत्तम लांडगे याला ११ ऑक्टोंबरपर्यंत पोलीस कोठडी
महाराष्ट्र संवाद न्यूज
संगमनेर – दूधगंगा नागरी सहकारी पतसंस्था घोटाळा प्रकरणी तपासात फारसी प्रगती होत नसतानाच या घोटाळ्यातील एक आरोपी पोलिसात हजर झाल्याने या प्रकरणाला आता वेगळे वळण मिळण्याची चिन्हे आहेत. मुख्य आरोपी भाऊसाहेब कुटे याच्या अडचणीत यामुळे आणखी वाढ होण्याची शक्यता वर्तवली जात आहे. दरम्यान पोलिसांनी उत्तम शंकर लांडगे (रा. वडगाव लांडगा, ता. संगमनेर) याला संगमनेरच्या जिल्हा व सत्र न्यायालयात हजर केले असता न्यायालयाने ११ ऑक्टोंबर पर्यंत त्याला पोलीस कोठडी सुनावली आहे.
तब्बल ८१ कोटी रुपयांच्या अपहार प्रकरणी मुख्य आरोपी भाऊसाहेब कुटे हा आपल्या कुटुंबीयांसह फरार आहे. तर पंधरा मुख्य आरोपींपैकी एकमेव व्यवस्थापक अटकेत असून आज न्यायालयासमोर हजर केलेल्या उत्तम शंकर लांडगे यांच्यासह सहा जणांवर या आरोपींना सहाय्य केल्याचा आरोप आहे.
सुरुवातीलाच याप्रकरणी पाच आरोपींना अटक करण्यात आली होती. यातील एका आरोपीला अटकपूर्व जामीन अर्ज मंजूर झाला असून कोठडीतील काही आरोपींना न्यायालयात जामीन मिळाला आहे.
उत्तम लांडगे हे दूधगंगा नागरी पतसंस्थेत कॅशियर म्हणून काम पाहत होते. लेखापरीक्षकांनी दाखल केलेल्या फिर्यादीत त्यांचादेखील आरोपींमध्ये समावेश असल्याने ते गुरुवारी आर्थिक गुन्हे शाखेत हजर झाल्यानंतर गुन्हे शाखेचे पोलीस निरीक्षक अरुण आव्हाड यांनी त्यांना पोलिसांनी अटक करून शुक्रवारी संगमनेरच्या जिल्हा व सत्र न्यायालयासमोर आणले होते. लांडगे यांच्यावतीने ॲड. श्रीराम गणपुले यांनी तर सरकार पक्षाच्या वतीने अतिरिक्त सरकारी वकील मच्छिंद्र गवते यांनी काम बघितले.
पोलिसांच्या वतीने सरकारी वकील गवते यांनी आरोपीला ९ हजार रुपये दरमहा पगार होता. त्याने ७५ लाख रुपये कर्ज कशाच्या जोरावर घेतले ? तसेच पतसंस्थेच्या मॅनेजरच्या खात्यावर त्यातले ५६ लाख १९ हजार रुपये ट्रान्सफर केले आणि १८ लाख ८० हजार रुपयांची रोख रक्कम स्वतः काढून घेतली. या सर्व रकमेची गुंतवणूक कुठे झाली, त्यात कोणाचा सहभाग आहे, प्रॉपर्टी कुठे कुठे घेतली याबाबतचा शोध घेणे आवश्यक आहे.
विशेष म्हणजे परतफेड दाखवताना संस्थेच्या अल्पबचत मुदत ठेव खात्यातून ८७ लाख रुपये काढून ते विजय गुंजाळ (मॅनेजरचा भाऊ) यांच्या अकाउंट वर आरोपीने जमा केले व पुन्हा ते आरोपीने स्वतःच्या नावावर कर्ज नील दाखवण्यासाठी वर्ग केले. अशाप्रकारे कॅशियर लांडगे याचा या संपूर्ण अपहार प्रकरणात नेमका काय रोल होता हे न्यायालयाच्या निदर्शनास आणून दिले. तर आरोपीचे वकील गणपुले यांनी याप्रकरणी आरोपीची बाजू मांडली. न्यायाधीश वाय. एच. आमेटा यांनी आरोपीला ११ तारखेपर्यंत पोलीस कोठडी ठेवण्याचे आदेश दिले.
मुख्य आरोपी भाऊसाहेब कुटेच्या अटकेचे काय?
दूधगंगा अपहार प्रकरणी तब्बल २१ जणांवर गुन्हा दाखल झाल्यानंतर मुख्य आरोपी असलेला राजकीय प्रतिष्ठित जिल्हा परिषदेचा माजी सदस्य व पतसंस्थेचा अध्यक्ष भाऊसाहेब कुटे कुटुंबीयांसह फरार आहे. या सर्वांचा अटकपूर्व जामीन अर्ज जिल्हा न्यायालयाने फेटाळल्यानंतर देखील तपास अधिकारी अद्यापही मुख्य आरोपींपर्यंत पोहोचू शकलेले नाहीत. भाऊसाहेब कुटेसह काही आरोपी राजकीय दृष्ट्या प्रतिष्ठित असल्याने व राज्यातील बड्या राजकीय नेत्यांबरोबर, अधिकाऱ्यांबरोबर असलेल्या त्यांच्या संबंधामुळे पोलीस आरोपींपर्यंत पोहोचत नसल्याची चर्चा होताना दिसते.
