महाराष्ट्र संवाद न्यूज
संगमनेर – संगमनेर तालुक्यातील पुणे-नाशिक राष्ट्रीय महामार्गावर असलेल्या चंदनापुरी गावच्या शिवारात एका बेकायदेशीर डिझेल विक्री केंद्रावर पोलीस उपाधीक्षक सोमनाथ वाघचौरे यांच्या मार्गदर्शनाखाली छापा सोमवारी टाकण्यात आला. या छाप्यात या डिझेल पंपाच्या माध्यमातून अवैधरित्या, असुरक्षित अवैध चोरटी डिझेल विक्री होत असल्याचे समोर आले आहे. याप्रकरणी पोलिसांनी दोघाजणांवर गुन्हा दाखल केला आहे.
नासिक-पुणे मार्गावरील चंदनापुरी शिवारात असलेल्या हॉटेल पांडुरंग समोर एका बंद ढाब्याच्या पाठीमागे बेकायदेशीर डिझेल विक्री सुरू असल्याची माहिती संगमनेरचे पोलीस उपअधीक्षक सोमनाथ वाघचौरे यांना मिळाली होती. वाकचौरे यांनी संगमनेर तालुका पोलीस स्टेशनचे पोलीस निरीक्षक देविदास ढुमणे यांना या संदर्भात कारवाईचे आदेश दिले होते.
नासिक-पुणे मार्गावरील हिवरगाव पावसा टोल नाक्याच्यापुढे काही अंतर गेल्यानंतर हॉटेल पांडुरंगाच्या विरुद्ध दिशेला ‘सुरत काठीयावाडी’ नावाच्या बंद ढाब्यामागे मोकळ्या जागेत पोलीस पथकाला पथकाला अवैधरित्या एका मोठ्या टँकरची टाकी जमिनीवर ठेवून या टाकीमधून पाईपलाईन करून लगतच्या एका पत्राच्या शेडमध्ये प्लास्टिक टाक्यांमध्ये डिझेल भरून ठेवलेले दिसून आले. इलेक्ट्रॉनिक मोटरच्या सहाय्याने हे डिझेल ओढून त्याची विक्री करण्यात येत होती. डिझेल भरण्यासाठी या ठिकाणी एक मशीन जोडले होते. त्याला इलेक्ट्रिक सप्लाय देऊन पोलिसांनी तपासून पाहिले असता त्याच्यावर ७७ रुपये लिटर असे रीडिंग दिसून आले.
त्यामुळे पोलिसांनी तातडीने याची माहिती संगमनेरच्या तहसीलदारांना दिली. तहसीलदारांनी घटनास्थळी पुरवठा अधिकारी गणेश भालेराव यांना पाठविले. पुरवठा अधिकारी भालेराव यांच्या समक्ष पंचनामा करून पोलिसांनी सर्व मुद्देमाल जप्त केला. या कारवाईत पोलिसांना १८ लाख २६ हजार रुपये किमतीचे २१००० लिटर डिझेल आढळून आले. तसेच पाच लिटर क्षमतेची एक, दोन-दोन हजार लिटर क्षमतेच्या दोन प्लास्टिक टाक्या, तीन हजार लिटर क्षमतेची एक लोखंडी टाकी आढळून आली.
कारवाई जप्त केलेले डिझेलचे सॅम्पल तपासणीसाठी पाठविण्यात आले आहे. याप्रकरणी संगमनेर तालुका पोलीस ठाण्यात बीट अंमलदार सचिन उगले यांनी दिलेल्या फिर्यादीवरून इंधनाचा असुरक्षित रित्या बेकायदेशीर साठा करून चोरटी विक्री केल्याप्रकरणी भारतीय दंड विधान कलम ४२०, २८५, ३४ तसेच जीवनावश्यक वस्तू अधिनियम १९५५ चे कलम ३ उल्लंघन ७ प्रमाणे व मुंबई वजन मापे अंमलबजावणी अधिनियम १९५८ चे कलम २५ प्रमाणे सोजित्रा भाविनकुमार आनंदभाई (वय २९, रा. सुरत, गुजरात, सध्या रा. चंदनापुरी, संगमनेर) व जागामालक नितीन सुनील गोसावी (रा. संगमनेर) या दोघांवर गुन्हा दाखल करण्यात आला आहे.
