महाराष्ट्र संवाद न्यूज
संगमनेर पोलिसांच्या निष्क्रियतेचे उदाहरण समोर आले आहे. पोलिसांच्या तपासाअभावी एका खून प्रकरणाचा उलगडा होण्यास विलंब लागत असल्याने मृत व्यक्ती आणि त्याच्या नातेवाईकांना न्याय कधी मिळणार असा प्रश्न उपस्थित होत आहे.
संगमनेर तालुक्याच्या पठार भागातील घारगाव पोलीस ठाण्याच्या हद्दीत सहा महिन्यांपूर्वी एका वृद्धाची धारदार शस्त्राने हत्या करण्यात आली होती. याप्रकरणी पोलिसांनी काही संशयित आरोपींची लाय डिटेक्टर (पॉलीग्राफ) चाचणीसुद्धा केली आहे मात्र तरीही पोलिसांना अद्यापही खुनी सापडला नसून यामुळे पोलिसांचे अपयश उघड झाले आहे.
फक्त गुन्हे दाखल करून पुढील तपासात काहीही निष्पन्न होत नसल्याचे प्रकार अथवा निष्पन्न न करण्याचा निष्काळजीपणा संगमनेर पोलिसांकडून होत आहे. यात संगमनेर उपविभागातील सर्वच पोलीस ठाण्यात असे प्रकार प्रकार आढळून येत आहे.
घारगाव पोलीस ठाण्याच्या हद्दीत सहा महिन्यांपूर्वी एका वयस्कर व्यक्तीचा त्याच्याच राहत्या घरी रक्ताच्या थारोळ्यात मृतदेह आढळून आला होता. पोस्टमार्टम नंतर सदर व्यक्तीचा धारदार शस्त्राने छातीवर, पाठीवर आणि हातावर वार करून, गंभीर दुखापत करून खून झाल्याचे निष्पन्न झाले होते.
याप्रकरणी घारगाव पोलिसांनी आधी अकस्मात मृत्यूची नोंद केली होती. त्यानंतर पुन्हा खुनाचा गुन्हा दाखल करण्यात आला. गेल्या सहा महिन्यापासून या खुनाचा तपास सुरू असून अज्ञात आरोपी अद्याप सापडलेला नाही. या खुनामध्ये किती आरोपी सहभागी आहेत ? त्यांची संख्या किती आहे ? हे सुद्धा पोलिसांकडून अद्याप पर्यंत निष्पन्न झालेले नाही. सुमारे आठ ते नऊ जणांची या प्रकरणात पोलिसांनी चौकशी केली आहे.
दरम्यान बऱ्याच संशयीतांची पोलिसांनी कसून चौकशी केली आहे. यामध्ये काही संशयीतांना परस्पर ताब्यात घेऊन त्यांची थेट ‘लाय डिटेक्टर (पॉलीग्राफ) चाचणी’ देखील पोलिसांनी करून टाकली असून त्यातून देखील पोलिसांच्या हाती काहीच लागले नसल्याचे माहिती सूत्रांकडून मिळाली आहे. विनाकारण काही संशयीतांना बेकायदेशीरपणे ताब्यात घेऊन त्यांच्या चौकशी आणि चाचणी केल्याने ते मानसिक तणावाखाली असल्याचे समजले.
पोलिसांच्या या तपास पद्धतीबाबत नाराजी व्यक्त होत आहे. त्यामुळे एकंदरीत या खुनाच्या तपासात पोलिसांकडून ‘साप साप म्हणत भुई धोपटायचे’ काम सुरू असल्याचे बोलले जात आहे. की तसे दाखवले जात आहे ? हा चर्चेचा विषय ठरला आहे. पोलिसांचा तपास नेमका कोणत्या दिशेने चालू आहे असा प्रश्न उपस्थित झाला असून ‘लाय डिटेक्टर (पॉलीग्राफ) चाचणी’ बाबतही यातील तज्ज्ञ मंडळींकडून शंका व्यक्त होत आहेत.
