महाराष्ट्र संवाद न्यूज
संगमनेर : मोबाईल नंबर ब्लॉक केला या कारणावरून संगमनेरमध्ये दोघाजणांनी महिलेवर कोयत्याने वार करून तिला गंभीर जखमी करण्याचा प्रकार समोर आला आहे. एकीकडे दसऱ्याच्या दिवशी शस्त्र पूजन सुरू असताना दुसरीकडे मात्र कोयत्यासारख्या शस्त्रानेच महिलेवर वार करण्याच्या प्रकारामुळे शहरात पोलिसांचा धाक उरला नसल्याचे दिसत आहे.
संगमनेर शहर पोलिसांनी राजेश जंबूकर व वैभव दांदे (रा. ढोलेवाडी, संगमनेर) या दोघांविरुद्ध महिलेच्या तक्रारीवरून गुन्हा दाखल केला आहे.
दसऱ्याच्या दिवशी शस्त्र पूजन केले जाते. मात्र संगमनेरात शस्त्राचा वापर करीत एका माहीलेला जखमी करण्यात आले आहे. मोबाईल नंबर ब्लॉक का केला याचा राग येत आरोपीने थेट फिर्यादीला कोयत्यानेच मारहाण केली.
फिर्यादी ही मित्र विलास काळे याच्यासोबत घरी असताना आरोपी राजेश जंबूकर आणि वैभव दांदे हे फिर्यादीच्या घरी आले व सदर फिर्यादीस ‘तू माझा मोबाईल नंबर ब्लॉक का केला’ असा जाब विचारत राजेश जंबूकर याने कोयत्याने फिर्यादीच्या दोन्ही हाताच्या बोटावर व डोक्यावर वार करून गंभीर जखमी केले. तसेच वैभव दांदे याने हातातील लाकडी दांडा फिर्यादीचा मित्र विलास काळे याच्या पायावर मारला. तर फिर्यादीला लाथा बुक्क्याने मारहाण, शिवीगाळ करत जीवे मारण्याची धमकी दिली.
फिर्यादीवर शहरातील खासगी रुग्णालय, घुलेवाडी येथील ग्रामीण रुग्णालय व लोणी येथील प्रवरा हॉस्पिटलमध्ये उपचार करण्यात आले. त्यानंतर फिर्यादीने दिलेल्या फिर्यादीवरून संगमनेर शहर पोलिसांनी दोघा आरोपी विरोधात गुन्हा दाखल केला असून पुढील तपास पोलीस हवालदार धनवट हे करत आहेत.
