महाराष्ट्र संवाद न्यूज
न्यायालयात दाखल असलेल्या खटल्यातून निर्दोष सुटलेल्या पोलिसाला सद्यस्थितीचा अहवाल देण्यासाठी दहा हजार रुपयांची लाच मागणारा पालघरच्या अतिरिक्त सत्र न्यायालयातील सरकारी वकील एसीबीच्या जाळ्यात अडकला आहे.
सुनील बाबुराव सावंत (वय 51 वर्ष, सध्या रा. शालिनी अपार्टमेंट, रूम नंबर 5, लक्ष्मीनारायण मंदिराच्या पाठीमागे, माहीम रोड, पालघर) असे लाच लुचपत विभागाने पकडलेल्या लोकसेवकाचे नाव असून ते अतिरिक्त सत्र न्यायालय पालघर येथे अतिरिक्त सरकारी अभियोक्ता- वर्ग 1 या पदावर कार्यरत आहे.
सरकारी वकील सावंत यांच्या विरोधात पालघर लाचलुचपत विभागाकडे तक्रार करण्यात आली होती. पालघर जिल्हा पोलीस आस्थापनेमध्ये पोलीस नाईक या पदावर कार्यरत असलेल्या तक्रारदाराविरोधात सन 2015 मध्ये तारापूर पोलीस ठाणे येथे गुन्हा रजिस्टर नंबर 3/15 भारतीय दंड विधान कलम 376 प्रमाणे दाखल होता. या खटल्याची सुनावणी पालघरच्या अतिरिक्त सत्र न्यायालयात झाली. तक्रारदार आरोपीला न्यायालयाने 2023 मध्ये या खटल्यातून निर्दोष मुक्त केले.
न्यायालयाने तक्रारदाराला निर्दोष मुक्त केले असल्याने तक्रारदाराने पालघर जिल्हा पोलीस आस्थापनेकडे त्यांच्या पदोन्नती बाबत अर्ज दाखल केला होता. या अर्जाच्या अनुषंगाने पालघर पोलीस अधीक्षकांच्या कार्यालयाकडून अतिरिक्त सरकारी अभियोक्ता यांच्याकडे पत्र व्यवहार करून तक्रारदार निर्दोष सुटलेल्या खटल्याबाबत सद्यस्थिती अहवाल मागविण्यात आला होता.
अहवाल पोलीस अधीक्षक कार्यालयाकडे सादर करण्याकरिता आरोपी लोकसेवक अतिरिक्त सरकारी अभियोक्ता सुनील बाबुराव सावंत यांनी बुधवारी (ता. 25 ऑक्टोंबर) तक्रारदाराकडे दहा हजार रुपये लाचेची मागणी केली. तडजोडीने ही रक्कम सात हजार रुपयांवर निश्चित झाली होती.
त्यानंतर पालघर लाचलुचपत विभागाचे पोलीस उपाधीक्षक दयानंद गावडे यांच्या नेतृत्वाखाली गुरूवारी (ता. 26 ऑक्टोंबर) पोलीस निरीक्षक शिरीष चौधरी, पोलीस हवालदार अमित चव्हाण, संजय सुतार, नवनाथ भगत, नितीन पागधरे, योगेश धारणे, महिला पोलीस हवालदार निशिगंधा मांजरेकर, स्वाती तारवी आणि जितेंद्र गवळी यांनी लावलेल्या सापळ्यात तक्रारदाराकडून सात हजार रुपयांची रक्कम स्वीकारताना सरकारी वकील सुनील सावंत याला रंगेहाथ पकडण्यात आले.
