महाराष्ट्र संवाद न्यूज
अहमदनगर : फटाक्याच्या स्टॉलसाठी आवश्यक असलेली परवानगी देण्याकरिता 800 रुपयांची लाच घेणाऱ्या संगमनेर शहर पोलीस ठाण्यातील पोलीस उपनिरीक्षकाला लाचलुचपत विभागाने पकडल्याची घटना मंगळवारी सायंकाळी घडली. अहमदनगरच्या लाचलुचपत विभागाने पोलीस उपनिरीक्षक बाळासाहेब यादव यांच्यावर ही कारवाई केली.
दीपावली सणानिमित्त निंबाळे गावी फटाका स्टॉलसाठी संगमनेर शहर पोलीस स्टेशनच्या ना हरकत दाखल्याची आवश्यकता होती. आवश्यक असलेली ना हरकत परवानगी देण्यासाठी यादव यांनी तक्रारदाराकडे एक हजार रुपयांची मागणी केली असल्याचे तक्रारदाराचे म्हणणे आहे. यासंदर्भात संगमनेर तालुक्यातील निंबाळे येथील एका 20 वर्षीय तरुणाने अहमदनगरच्या लाचलुचपत प्रतिबंधक विभागाकडे मंगळवारी (31 ऑक्टोंबर) तक्रार केली होती.
लाच लूचपत प्रतिबंधक विभागाचे पोलीस उपाधीक्षक प्रवीणचंद्र लोखंडे यांच्या पर्यवेक्षणाखाली पोलीस निरीक्षक राजू आल्हाट यांच्या नेतृत्वाखाली पोलीस नाईक राधा खेमनर, पोलीस कॉन्स्टेबल बाबासाहेब कराड, पोलीस कॉन्स्टेबल सचिन सुद्रुक, वाहन चालक हरून शेख यांच्या पथकाने पोलीस उपनिरीक्षक यादव यांना पकडण्यासाठी सापळा लावला होता.
तक्रारदाराकडून तडजोडीअंती आठशे रुपयांची लाच स्वीकारताना यादव यांना शहर पोलीस ठाण्यात पकडण्यात आले.
