महाराष्ट्र संवाद न्यूज
दीपावलीची धामधूम सुरू असतानाच भाऊबीजेच्या दिवशी पोलीस शिपायाने स्वतःवर रायफलने गोळी झाडून घेत आत्महत्या केल्याचा प्रकार समोर आला आहे.
राहुल शिरसट (वय 35 वर्ष) असे आत्महत्या केलेल्या पोलीस शिपायाचे नाव असून आत्महत्येचे निश्चित कारण लगेच समजू शकलेले नाही. मंगळवारी सकाळी नऊ वाजण्याच्या सुमारास सोलापूर शहरातील केशवनगर पोलीस वसाहतीत ही घटना घडली. यामुळे पोलीस दलात खळबळ उडाली आहे.
सोलापूर शहर पोलीस आयुक्तालयात पोलीस मुख्यालयात नेमणुकीस असलेले राहुल शिरसाट हे पोलीस आयुक्त बंगल्यावर सुरक्षा रक्षक म्हणून कार्यरत होते. सुरक्षेसाठी शिरसट यांच्याकडे एसआरएल रायफल होती. ड्युटी संपल्यावर ते आपल्याकडील रायफल जमा करत असत. बुधवारी सकाळी ड्युटी संपल्यानंतर त्यांनी आपल्याकडील रायफल जमा न करता ती घरी नेली होती.
केशवनगर पोलीस वसाहतीत त्यांनी राहत्या घरी हनुवटीवर रायफल ठेवून ट्रिगर दाबला असल्याचे घटनास्थळी दिसून आले. आवाजाने आजूबाजूला राहत असलेल्या पोलिसांनी त्यांच्या रूमकडे धाव घेतली असता ते रक्ताच्या थारोळ्यात पडले असल्याचे दिसून आले. दरम्यान, शिरसट यांना छत्रपती शिवाजी महाराज सर्वोपचार शासकीय रुग्णालयात दाखल केले असता त्यांना मृत घोषित करण्यात आले.
घटनेची माहिती मिळताच वरिष्ठ पोलीस अधिका-यांसह सदर बाजार पोलीस ठाण्याचे पोलीस अधिकारी घटनास्थळी दाखल दाखल झाले.
मृत शिरसट हे २०११ साली महाराष्ट्र पोलीस दलात भरती झाले होते. २०१७ साली त्यांनी सोलापूर शहर पोलीस आयुक्तालयात बदली करून घेतली होती. त्यांचे अख्खे कुटुंबीय पोलीस दलात आहे. त्यांचे वडील सेवानिवृत्त सहायक फौजदार असून पत्नी सोलापूर ग्रामीण पोलीस दलात तर भाऊ शहर पोलीस आयुक्तालयात कार्यरत आहे. बहीण पोलिस अधिकारी आहे.
