महाराष्ट्र संवाद न्यूज
संगमनेर: अधिकार नसताना देखील निष्काळजीपणा करत अपूर्णपणे गर्भपात करून गर्भ पिशवीत मांसाचा तुकडा शिल्लक ठेवून अयोग्य पद्धतीने उपचार करून महिलेच्या मृत्यूस कारणीभूत ठरल्याचा कारणावरून अकोले तालुक्यातील राजुर येथील डॉ. बाबासाहेब तुकाराम गोडगे यांच्या विरोधात राजुर पोलीस ठाण्यात गुन्हा दाखल करण्यात आला आहे. डॉक्टरवर गुन्हा दाखल झाल्याने वैद्यकीय क्षेत्रात खळबळ उडाली आहे.
राजुर पोलीस ठाण्याचे पोलीस उपनिरीक्षक जैनुद्दीन शेख यांच्या फिर्यादीवरून डॉ. गोडगे यांच्या विरोधात भारतीय दंड संहिता 1860 कलम 304 अ तसेच वैद्यकीय गर्भपात अधिनियम 1971 कलम 5 अन्वये हा गुन्हा दाखल करण्यात आला असून पोलीस पुढील तपास करत आहे.
अधिक माहिती अशी, अकोले तालुक्यातील शेणीत येथील सीताबाई संदीप तळपे या 24 वर्षीय विवाहितेच्या अंगावरून जात असल्याचा कारणावरून डॉक्टरांनी दिलेली गोळी घेऊन 11 मार्च 2023 रोजी झोपी गेली होती. तिला झोपेतून उठविण्यासाठी तिचा पती गेला असता तिची दातखीळ बसली असल्याचे दिसल्याने तिला औषधोपचारासाठी राजुरच्या ग्रामीण रुग्णालयात आणले होते. तेथील वैद्यकीय अधिकाऱ्याने ती उपचारापूर्वीच मृत झाल्याचे घोषित केले. याप्रकरणी राजुर पोलीस ठाण्यात अकस्मात मृत्यूची नोंद करण्यात आली होती.
तसेच राजुर येथील ग्रामीण रुग्णालयात फॉरेन्सिक एक्सपर्ट उपलब्ध नसल्याने तिच्या मृतदेहाचे शवविच्छेदन लोणी येथील प्रवरा रुग्णालयात करण्यात आले. वैद्यकीय अहवालात या महिलेचा मृत्यू गर्भपातामुळे झाल्याचे नमूद करण्यात आले. तसेच मृत महिलेचा व्हिसेरा तपासणीसाठी नाशिकच्या प्रयोगशाळेकडे पाठविण्यात आला.
उपनिरीक्षक शेख यांनी केलेल्या अकस्मात मृत्यूच्या चौकशी दरम्यान साक्षीदारांचे जबाब नोंदविले होते. यात मृत झालेली महिला चार महिन्यांची गरोदर असताना डॉ. भोकनळ यांच्या सल्ल्यानुसार तिची सोनोग्राफी करण्यात आली. सोनोग्राफीच्या अहवालानंतर डॉक्टरांनी पोटातील गर्भ खराब असल्याचे सांगून तो काढून टाकण्याचे सुचविले होते.
त्यामुळे कुटुंबीयांनी या महिलेला राजुर येथील डॉ. बाबासाहेब गोडगे यांच्या रुग्णालयात दाखल करून तिचा गर्भपात करून त्याच दिवशी तिला रुग्णालयातून डिस्चार्ज देण्यात आला होता. तेव्हापासून तिच्या पोटात दुखत होते. पोटात जास्त दुखू लागल्याने तिला पुन्हा डॉ. भोकनळ यांच्याकडे नेण्यात आले. भोकनळ यांच्या सल्ल्यावरून या महिलेची पुन्हा सोनोग्राफी केली असता सोनोग्राफीच्या अहवालात संबंधित महिलेच्या पोटात गर्भाचा तुकडा राहिला असल्याने अपुरा गर्भपात झाला असल्याचे निष्पन्न झाले.
त्यामुळे रुग्ण महिलेची पिशवी साफ करण्याचा सल्ला देण्यात आला होता. या महिलेला पुन्हा त्रास झाल्याने तिला डॉ. भोकनळ यांनी गोळ्या देऊन घरी पाठविले. 11 मार्च 23 रोजी रात्री जेवणाआधी एक गोळी घेऊन महिला झोपी गेली असता सकाळी झोपेतच तिचा मृत्यू झाला होता.
पोलिसांनी डॉ. गोडगे व डॉ. भोकनळ यांनी केलेल्या गर्भपाताच्या उपचारा संदर्भात जिल्हा शल्यचिकित्सकांचा अभिप्राय घेण्यात आला. शल्यचिकित्सकांनी चौकशीसाठी एक समिती नेमली होती.
समितीने केलेल्या औषधोपचाराच्या कागदपत्रांच्या तपासणीत डॉ. बाबासाहेब गोडगे यांना गर्भपात करण्याचा अधिकार नसल्याचे स्पष्ट करत त्यांनी या महिलेवर केलेले उपचार योग्य नव्हते. त्यामुळे त्यांच्यावर कारवाई करण्यात यावी, असा अभिप्राय दिला होता. या आधारे डॉ. गोडगे यांच्यावर गुन्हा दाखल करण्यात आला आहे.
