महाराष्ट्र संवाद न्यूज
गावठी कट्टा आणि दोन राऊंड सोबत बाळगत संशयास्पदरित्या फिरणाऱ्या श्रीरामपूरमधील व्यक्तीला संगमनेर पोलिसांनी जेरबंद केले आहे. विक्रीच्या उद्देशाने गावठी कट्टा आरोपीने जवळ बाळगण्याचे पोलिसांच्या चौकशीत निष्पन्न झाले आहे.
अज्जू उर्फ अजीम अन्वर पठाण (वय 26 वर्ष, रा. वार्ड नंबर 1, मिल्लतनगर, श्रीरामपूर असे पोलिसांनी पकडलेल्या व्यक्तीचे नाव आहे. बुधवारी सायंकाळी वडगाव पान ते समनापुर दरम्यान ही कारवाई करण्यात आली.
राष्ट्रपती द्रौपदी मुर्मु आज गुरुवारी शनिशिंगणापूर दौऱ्यावर येत आहे. या पार्श्वभूमीवर सतर्क झालेल्या संगमनेर पोलिसांनी परिसरातील हॉटेल, लॉजिंगची तपासणी व नाकाबंदी सुरू केली असताना त्यांना यासंदर्भात गोपनीय माहिती मिळाली होती.
पोलिसांनी संबंधित व्यक्तीला ताब्यात घेऊन त्याची अंगझडती घेतली असता त्याने कमरेच्या पट्ट्याखाली एक गावठी बनावटीचे पिस्तूल व दोन राउंड लपविले असल्याचे आढळून आले. संगमनेर तालुका पोलीस ठाण्याचे पोलीस निरीक्षक देविदास ढुमणे, पोलीस उपनिरीक्षक सातपुते, पोलीस हवालदार डमाळे, राहुल डोके, राहुल सारबंदे यांनी ही कारवाई केली.
आरोपीला संगमनेर तालुका पोलीस ठाणे आणून त्याची चौकशी केली असता सदरचा गावठी कट्टा कल्याण येथून श्रीरामपूरमध्ये विक्री करण्यासाठी आणला असल्याचे सांगितले. त्याच्या विरोधात पोलीस ठाण्यात भारतीय हत्यार कायदा कलम 5, 3, 25, 25 (8) नुसार गुन्हा दाखल करण्यात आला आहे. आरोपी विरोधात श्रीरामपूर शहर पोलीस ठाण्यात विविध गुन्हे दाखल असून त्याने हा गावठी कट्टा कोणाकडून घेतला व कोणाला विक्री केला जाणार होता याबाबत पोलीस पुढील तपास करत असल्याची माहिती संगमनेरचे पोलीस उपाधीक्षक सोमनाथ वाघचौरे यांनी दिली.
