बुधवार दि. १० एप्रिल
एका सामाजिक व राजकीय कार्यकर्त्यावरील हद्दपारीचा प्रस्ताव रद्द करण्यासाठी दीड लाख रुपयांची लाच स्वीकारताना सोमवारी (१ एप्रिल) एलसीबीचे पीआय दत्तात्रय शिंदे, पोलीस हवालदार अशोक पाटील आणि नितीन मोहने यांना लाच लुचपत विभागाने अटक केली होती. आता या पीआयच्या घरात लाच लुचपत विभागाला मोठे घबाड सापडले आहे.
धुळे जिल्ह्यातील दोंडाईचा येथील राजकीय व सामाजिक चळवळीत सक्रिय असलेल्या व्यक्ती विरोधात दाखल असलेल्या गुन्ह्यांसंदर्भात स्थानिक गुन्हा अन्वेषण शाखेचे पोलीस हवालदार नितीन मोहने व पोलीस हवालदार अशोक पाटील यांनी या राजकीय कार्यकर्त्याची भेट घेत त्याच्यावर आतापर्यंत दाखल असलेल्या गुन्ह्यांची माहिती काढून तसेच लोकसभा निवडणुकीच्या पार्श्वभूमीवर दोंडाईचा पोलीस स्टेशनकडून प्रस्ताव मागवून जिल्ह्यातून हद्दपार करणार आहोत, असे या दोघांनी तक्रारदाराला सांगितले.
हद्दपारीची कारवाई होऊ द्यायची नसेल तर, पोलीस निरीक्षक दत्तात्रय शिंदे साहेबांना दोन लाख रुपये द्यावे लागतील, असे या दोघांनी तक्रारदाराला सांगितले. तसेच पोलीस निरीक्षक दत्तात्रय शिंदे यांची भेट तक्रारदारांनी घ्यावी असा सल्लाही त्यांनी दिला. त्यामुळे तक्रारदार यांनी १ एप्रिल रोजी धुळ्याच्या पोलीस अधीक्षक कार्यालयातील स्थानिक गुन्हे शाखेच्या कार्यालयात जात पोलीस निरीक्षक दत्तात्रय सखाराम शिंदे यांची भेट घेतली असता पोलीस निरीक्षक शिंदे यांनी तक्रारदार यांच्याकडून पंचांसमक्ष दोन लाख रुपये लाचेची मागणी केली. तसेच सदरची रक्कम पोलीस हवालदार नितीन आनंदराव मोहने व पोलीस हवालदार अशोक साहेबराव पाटील यांना देण्याचे सांगितले होते. त्यानंतर लगेचच तक्रारदाराने लाचलुचपत प्रतिबंधक विभागाच्या धुळे कार्यालयाकडे तक्रार दिली होती.
दोंडाईचा येथे दोंडाईचा-धुळे रस्त्यालगत असलेल्या जैन मंदिरासमोरील मोकळ्या जागेत ठरल्याप्रमाणे पोलीस हवालदार नितीन मोहने व अशोक पाटील यांनी तडजोडीअंती दीड लाख रुपये लाचेची रक्कम स्वीकारली होती. अटक केलेल्या पोलीस निरीक्षक शिंदे आणि त्याच्या दोघा सहकार्यांना न्यायालयाने दोन दिवसांची पोलीस कोठडी दिली होती.
दरम्यान याप्रकरणी लाच लुचपत शाखेच्या अधिकाऱ्यांनी एलसीबी पोलीस निरीक्षक शिंदे याच्या घराची झडती घेतली असता पोलिसांना घरात मोठे घबाड आढळून आले.
लाचखोर पोलीस निरीक्षकाच्या घरात नेमकं काय सापडलं…
९०० ग्रॅम वजनाचे ५९ लाख रुपयांचे दागिने.
१० लाख रुपये किमतीचे चांदीचे दागिने.
१ लाख २६ हजार रुपयांची रोकड.
स्वतःसह पत्नी आणि इतर नातलगांच्या नावावर असलेली १ कोटी ७५ लाख रुपयांच्या मालमत्तेची कागदपत्रं.
